【瘋狂放閃】遇上Oscar最幸福 江若琳獲阿田祝福攬住齊齊喊

田蕊妮主持的無線節目《1+1的深情》，新一集有江若琳（Elanne）和蕭潤邦（Oscar）瘋狂放閃兼有「洋蔥」。二人在07年以歌手身份出道，相識10載由老友升呢為戀人，去年底Oscar更在上海成功向Elanne求婚，今次在節目中細數拍拖過程。

節目開頭阿田已帶定嘔吐袋、氧氣罩及黑超，聽到Oscar與Elanne的綿綿情話即大派用場。Elanne甜蜜分享Oscar以「人肉鬧鐘」招數展開追求，就算開工時間是早上5、6點，Oscar都準時以短訊叫醒Elanne，令她冧爆話：「一向係自己起，好耐冇人叫過我起身，嗰一刻好感動。」

阿田直言未識Elanne之前唔鍾意對方，認識後大讚Elanne心地善良，不過印象中見到對方喊多過笑，很辛苦。Elanne亦感言以前自覺可以孤身一世，直至與Oscar拍拖感到世上有人可信賴，又搞笑指每次見到未婚夫都會喊，是開心的眼淚，感觸「點解有人咁錫我」。此時見到Elanne流淚，Oscar伸手為愛人抺眼淚，小小舉動相當甜蜜。

講到夢幻婚禮，Elanne想婚禮上有拱門、花海及煙海，被Oscar取笑似天堂。節目組為一對準新人炮製驚喜，搭建天堂Feel的預演婚禮，阿田、Elanne好友小肥、經理人及粉絲送上祝福。阿田落淚稱Elanne遇到的經歷是旁人沒法想像，只希望有好男人照顧對方的下半生，見到好友覓得幸福，她跟Elanne深情攬攬，氣氛洋溢著愛。