同門挑機「生麵王 」張敬軒惡搞Chef Nic謝霆鋒

謝霆鋒近年鑽研廚藝，仲拍埋美食節目《12道鋒味》，早前更獲頒「米芝蓮之友」的榮譽。最愛Chok住下廚的「Chef Nic」謝霆鋒，在米芝蓮晚宴上著了「軍官廚師服」，以「摩打手」擠朱古力醬的片段被瘋傳，繼黃秋生模仿Chef Nic後，又有同門師弟妹張敬軒、鍾舒漫（Sherman）Chok爆玩二次創作，畫面搞笑。 二人在社交平台上載短片，似乎是打邊爐時忽發奇想扮Chef Nic，張敬軒在服裝下了心思，兩邊膊頭掛上生麵，拿起叉住肥牛的筷子放入鍋內快速攪拌。兩團生麵揈揈吓，張敬軒在英姿及造型上都無得輸，最後更將生麵放落鍋，動作完美。他更擔心Chef Nic嬲豬，玩完再備案：「#生麵王 2.0，話說我驚鋒師兄嬲嬲，諗諗下都係send條片俾（畀）佢報定案先，點知佢第一句問我點解唔配樂。好，我九秒九即配！各位朋友，請將音量收細...... #識睇一定係睇sherman啲表情」。他更表示有食晒啲生麵，並自封與Sherman組成「南亞人氣組合」，唔怕死地寸爆加Hashtag「 #十二道UP味 #肥牛生麵米痴蓮 #我全程咬住條脷忍笑 #咩味 #癲夠味 #仲有 #鋒味」。