顏卓靈踢走清純做惡女：未見過我真面目咪話鍾意我

顏卓靈（Cherry）以樂壇新人姿態再有新歌派台，今次《惡女》踢走可愛清純形象，全新惡形惡相示人，原來這個「紅眼惡女」才是Cherry的真面目！ 日前Cherry為這歌拍攝MV，其中一個造型就是火紅色眼影、硬崩崩假髮、黑白分明服裝，加上一副生人勿近的表情，炎炎夏日都有一陣寒意入骨！Cherry謂這歌旋律有少許情歌味道，但她自稱性格不適合太重的愛情元素。她說：「大家見我有啲肉地好可愛，又有隻爆牙，好似好開心咁，其實真正嘅我唔似表面咁。外表係天生，但內心和性格係好個人。我呢個人生得太可愛，成日都被標籤好開心、好陽光，仲跳埋舞跳跳紥，其實我另一面嘅我成日會胡思亂想，又會好惡，反差太大，會令人好驚訝！藉住呢首歌我想同大家講，我份人就係咁㗎啦，未睇清楚我真面目之前，唔好貿貿然就話鍾意我。不過，之所以我會展示咁真實惡樣嘅人，都係我好珍惜、珍貴嘅人！」「見識」最多Cherry真面目的人，當然是最親的媽咪，她自爆小時候經常與媽咪吵架，曾經一次發脾氣大力閂門夾傷媽咪隻手，非常難忘！

此外，Cherry透露MV裹還有另一個較溫柔的造型，跟「紅眼惡女」來個大反差，亦為此她特別抽了幾日學現代跳舞。Cherry 說：「我本身都好鍾意現代舞，但揀咗跳街舞，唔係後悔，只係如果再有更多時間，我會去學現代舞。今次為拍MV去學咗3日舞，每日花好多時間練習，但唔覺得辛酸，因為係自己好鍾意嘅事，就算受傷擦損流血都唔介意！」除了現代舞，Cherry表示最近接觸了Pole Dance（鋼管舞），說：「表面上跳Pole Dance嘅女仔好性感、好優美，其實著得咁性感係要用大髀和手臂啲肉『啜』住支鋼管，我嘗試上鋼管2秒，嘩，好痛好痛呀，我諗我要多啲時間去克服和學習先至可以表演畀大家睇！」