網民自製「遮樽」代即棄遮袋　環保方法網上瘋傳

近日天氣不穩，忽然傾盆大雨，雨傘必不可少！不少商場及商舖都會提供用膠製的「遮袋」，放在門口讓顧客任用，有透明亦有磨砂，但不過即使再環保，多用幾次始終會「穿窿」，有些人更會用一次就掉，成為「即棄遮袋」。

有網民眼見這種情況越來越嚴重，結果就絞盡腦汁，用身邊物DIY，如何做到遮不濕身，又不用即棄遮袋。正所謂高手在民間，網民Zion Cheung呻「見到各商場食肆門口又係一個二個用完即棄裝遮膠袋就火到黎」，並隨即圖文齊附，介紹「環保遮樽」，用上一個平日的蒸餾水樽，樽頭向下，將樽底切開，然後用膠紙包好切開的邊緣，以防刮傷，縮骨遮就可以放入自製「遮樽」內，而在樽內的水，亦可以扭開樽蓋排走，功能多多。

此方法一出，引來大批網民激讚，還有人提議雕朵花上去更漂亮，也有網民說自己平日會帶袋，用完再用。 網民Steffi Ng更展示相片「加左條帶」，尤如小學生水樽一樣，具有創意，更笑言可以用「未用過既bra帶，或者唔要既褲頭繩或者係普通棉繩」。