霆鋒民間廚神全球選拔！200萬港紙助創業　

謝霆鋒由歌手變做老闆，再憑內地飲食節目《十二道鋒味》，搖身一變讓大家認識佢嘅廚藝，近日亦獲美國FOX電視台邀請拍攝外國版《鋒味》。噚晚霆鋒，又有新搞作，係專頁話有「200萬」等大家去攞，究竟搞乜？

對上一次關於霆鋒嘅新聞，經已係講「名嘴」宋祖德於社交網聲稱「鋒菲」已分手，更揚言若爆錯料會「直播吃狗屎」，結果被霆鋒「寸」返轉頭。噚晚霆鋒專頁話上載影片，話「200萬獎金，等住你！」又型又chok爆，仲留言「港幣200萬擺係到，有膽就嚟攞！#鋒味 #煮出全球」不過好多粉絲留言問究竟點攞？

原來新一季節目，將會大搞民間廚神選拔大賽，將會進行全球選拔，然後預計暑假檔期會進行「廝殺大賽」，最後八強會「跟住霆鋒去學藝」四圍去，拜會全球星級大廚，最後最後頭幾名就會瓜分總值200萬嘅創業基金。不過詳情點報名？就要睇遲啲霆鋒嘅「鋒味平台」。霆鋒唔單只有商業頭腦，今次仲回饋社會發掘廚神，認真唔話得！