粉絲排隊買「米田共」　謝霆鋒抽水賺返筆

愛得甜蜜的「鋒菲」早前被內地名嘴宋祖德爆料，指二人已協議分手，更發誓爆錯料會「直播吃400克狗屎」。謝霆鋒的《鋒味》面書專頁曾留言「期待佢食畀我哋睇」否認情變，又晒過腰間「愛的紋身」闢謠。昨日謝霆鋒玩「屎」，上載海報表示其餅店於今日限量發售「400g純狗米田共」朱古力曲奇，更留言「找數真漢子，夠鐘要食屎！」明顯叫宋祖德兌現承諾。

今日發售「米田共」曲奇，認真商機處處，估唔到真係有人捧場排隊去買。《鋒味》 面書專頁上載分店門口相，有10多位顧客正在排隊，並留言：「真的沒想到我哋嘅『K9米田共』朱古力POP咁受大家歡迎！痾（屙）完就無，有買襯（趁）早！」有忠實粉絲撐霆鋒，亦有網民直指今次做法有點「膠」。 另外，狗屎一事令傳媒翻看昔日報道，原來11年前鋒菲分手後，王菲經理人陳家瑛曾在自己的專欄中爆當年鋒菲分手，令王菲傷心得在房中自閉，不願見任何人。