阿仔求其送風扇畀張繼聰　謝安琪目擊：當時佢冇接到

張繼聰同老婆謝安琪（Kay）一家四口好幸福，昨日係父親節，細女張靖仲係BB，未識送禮物畀爸爸，10歲囝囝張瞻算係有啲表示，拎出自己唔鍾意嘅風扇仔，好「瀟灑」咁賀父親節。知足嘅張繼聰都有收好份小禮物，並留言多謝阿仔：「我個仔送俾（畀）我嘅父親節禮物，我問佢：你買架（㗎）？佢話：唔知邊道搵出嚟....我諗依份禮物嘅寓意係....吹咩！？Anyways，多謝，外景啱用」。

目擊事件經過嘅Kay，搞笑讚兩仔爺係「瀟灑的父子」，詳細交代當時嘅來龍去脈。佢喺社交平台留言：「今日父親節，我個仔乜嘢都冇準備，我老公讚佢瀟灑。然後我問佢係咪應該都有少少野（嘢）送俾（畀）爹哋？於是佢唔知係邊度摷到一個，佢自己唔鍾意嘅風扇，晚餐時送俾（畀）爹哋。然而，佢老豆（竇）都好瀟灑：佢見到個仔俾（畀）份咁嘅禮物佢，佢接都冇接到，手都冇伸出嚟。只係問左（咗）一句：個風扇仔你買㗎？個仔答：頭先唔知喺邊度搵到既（嘅）。個風扇就咁滯留咗係（喺）枱面，場面相當無奈。完。」 原以為父親節禮物事件現「羅生門」，張繼聰最終冇要到風扇，網民都叫兩公婆「夾口供」。不過Kay再加插留言，交代風扇嘅去向，「PS：飯後，老豆（竇）發左（咗）post，多謝仔仔既（嘅）禮物，小風扇總算守得雲開見月明，關心小風扇下場既（嘅）朋友，你地（哋）可以放心喇」。