【父親節快樂】杜德偉秀髮亂了忙湊仔　黎諾懿服侍小春雞沖涼

今日係父親節，圈中唔少藝人都貼相頌親恩，成為主角的星爸則有心肝椗陪伴過節。蘇永康在社交平台上貼出囝囝Jazz用手仔捉佢手指的溫馨照，並感恩Jazz加入蘇家：「家父2000年已仙遊，本來以為終生只需祝福他人的節日，今天竟然受到祝福，我感恩上天的安排！這小手一捉彷彿就是終身的承諾！不管高山低谷，只管風雨同路，相扶同行.....祝福大家父親節快樂」。 同樣首次以人父身份慶祝父親節的杜德偉，一早起身秀髮亂了，即忙住照顧B仔AJ，感人地留言：「習慣每天醒來看見你甜美可愛的笑容，一切心滿意足，如果女孩們都是爸爸們的前世情人，你這個小男孩便是我上輩子最好的手足！謝謝你來到我們家讓我有一個幸福的父親節。」成為廿四孝爸爸的黎諾懿「出賣」囝囝小春雞，開心分享幫小春雞沖涼的短片，囝囝又舒服又冧，睇嚟爸爸服侍周到。

另外，已育有兩女的胡諾言去年追仔成功，老婆陳琪誕下囝囝胡澔錕（Jayden），今年有B仔加入胡家，胡諾言都貼出自己與Jayden的合照，並表示：「做咗人爸爸八年，胡家三寶成為我人生既（嘅）動力！今年你係第一年同我度過父親節！而（依）家我就錫你多啲，到我老咗你要錫返我啦 ！」 周慧敏祝老爺倪匡父親節快樂，更貼出二人站在佈景板後，扮卡通古裝人物的照片，仲搞笑地讚「老爺好可愛」；楊千嬅亦貼出與家人食飯、切Cake的照片，不過老公丁子高已飛咗去上海開工，未有出席飯局，唔知囝囝Torres送乜嘢去氹爸爸呢？