分享戀愛心得　阿Sa有感而發：好多人混淆愛同喜歡

蔡卓妍（阿Sa）、李敏接受奇妙電視節目《同sing同戲》訪問，談到李敏為愛情電影《原諒他77次》編劇，與女主角阿Sa再合作，李敏笑指在愛情問題上，要向後輩阿Sa請教。李敏笑道：「我覺得愛一個人係種習慣，一旦分開需要好長時間去適應，所以我接受唔到有啲人呢頭分手，嗰頭已經同緊第二個一齊，我請教阿Sa，阿Sa教我唔好太在乎。」

阿Sa即分享個人想法，講明愛與喜歡是不同層次，她說：「因為有好多嘢唔到我哋控制嘛，況且好多人混淆咗愛同喜歡，可能平時like（喜歡）慣臉書。愛其實係另一層次，愛好難講出口，要喺好重要嘅時候講先可以令呢句說話充滿份量，成日講住喜歡，根本唔係嗰回事。」 阿Sa又表示會與李敏構思一系列女性維他命電影，她說：「女性喺唔同階段需要唔同維他命補給，譬如音樂、電影、書籍，令自己保持青春、心情同皮膚狀態等，希望開拍成功！」