105%慳妹：男人要有資產　會計師Tracy話冇樓結婚好冇面

「105%慳妹」Macy，23歲之前已成功上車的故事，似乎與《有樓萬事足》塑造的「縮骨慳家」形象有所不同。酷愛旅行的Macy，高峰期可一年飛兩次美國，好肯使錢歎世界、買名牌物品，更向阿媽借部份首期。自稱做文員的Macy，聲稱行業好景時試過月入4萬元。 昨晚第二集《有樓萬事足》中，講到Macy買入市價335萬的旺角細單位，更已升值了50萬，自覺叻叻豬的她，語氣略帶輕佻地指有朋友睇死佢買樓係錯的選擇，她說：「睇死我嗰啲人，斷估你人工一年都儲唔到50萬掛。」 節目又安排Macy與90後男性朋友討論買樓，男性朋友理性地表示：「唔買私人樓，可以買居屋，青春係唔可以用錢去衡量。」Macy以質疑的態度指：「你係男人，應該要有資產。居屋冇會所，難道你老婆想要會所，喺公屋裝個畀佢？」 另外，有一對同是任職會計師的情侶Alan、Tracy去睇樓，Tracy自言冇樓揸手結婚好冇面：「請飲當日，我自己會覺得冇面，人哋會覺得，吓？租㗎咋？會睇唔起你。」身旁的Alan亦嘆結婚要睇資產，相當無奈。