樓奴？　女大學生兼職月入幾皮嘢　月使50蚊男10年儲到首期

喺香港呢個彈丸之地，地少人多又有土地問題，上車買樓係唔少人嘅夢想。TVB昨晚首播的真人騷《有樓萬事足》入面，除咗訪問坐遊艇歎靚酒嘅金融公司老闆Paul外，亦有奮力向上，靠慳靠兼職儲錢的「勵志個案」。 21歲的大學生賴顏妤（Vivienna），讀商管系，相信「買樓改變命運」。身為學生的她，竟然能夠分身有多份兼職，做Model、撈埋保險，未正式投身社會，已經月入4、5萬，甚至10萬。Vivienna亦自爆偏愛成熟男，試過有40幾歲男士展開追求，佢唔多Like同齡男仔無所事事唔知想做乜，仲話「有樓喺手，人哋當你係神」。 另一位成功上車男岑先生，堅持日使50蚊，10年成功儲到300萬，買到西半山一個600呎單位。慳得離譜的岑生話：「人哋用新款電話，我仲用2G，朋友順理成章唔使點見。」為咗層樓，冇乜娛樂，做埋「隱蔽中年」咁款，似乎又太盡。 「成功個案」入面，仲有月儲105%的慳妹Macy，唔畀家用，出外使費靠男人，連八達通都要屋企人增值。Macy辛苦儲錢，成功3年內買到旺角嘅細單位，不過Macy媽都嬲豬鬧阿女「好自私」。至正常、至抵讚的貼地個案，就係32歲的市場推廣經理Inky。從小慳家的Inky，冇乜娛樂節目，十幾歲做兼職做到有「五十肩」。靠自己上車的她，明言「你冇唔緊要，我有」，Inky有樓招親只求專一男友。