楼奴？　女大学生兼职月入几皮嘢　月使50蚊男10年储到首期

喺香港呢个弹丸之地，地少人多又有土地问题，上车买楼系唔少人嘅梦想。TVB昨晚首播的真人骚《有楼万事足》入面，除咗访问坐游艇叹靓酒嘅金融公司老板Paul外，亦有奋力向上，靠悭靠兼职储钱的「励志个案」。 21岁的大学生赖颜妤（Vivienna），读商管系，相信「买楼改变命运」。身为学生的她，竟然能够分身有多份兼职，做Model、捞埋保险，未正式投身社会，已经月入4、5万，甚至10万。Vivienna亦自爆偏爱成熟男，试过有40几岁男士展开追求，佢唔多Like同龄男仔无所事事唔知想做乜，仲话「有楼喺手，人哋当你系神」。 另一位成功上车男岑先生，坚持日使50蚊，10年成功储到300万，买到西半山一个600尺单位。悭得离谱的岑生话：「人哋用新款电话，我仲用2G，朋友顺理成章唔使点见。」为咗层楼，冇乜娱乐，做埋「隐蔽中年」咁款，似乎又太尽。 「成功个案」入面，仲有月储105%的悭妹Macy，唔畀家用，出外使费靠男人，连八达通都要屋企人增值。Macy辛苦储钱，成功3年内买到旺角嘅细单位，不过Macy妈都嬲猪闹阿女「好自私」。至正常、至抵赞的贴地个案，就系32岁的市场推广经理Inky。从小悭家的Inky，冇乜娱乐节目，十几岁做兼职做到有「五十肩」。靠自己上车的她，明言「你冇唔紧要，我有」，Inky有楼招亲只求专一男友。