大市窄幅上落 重返21000之上困難重重｜古天后
2024-10-25 09:29 
10月25日，大致天晴，初時非常乾燥，晚上多雲及有一兩陣驟雨。美股隔晚個別發展，美企業績表現參差，而首次申領失業救濟人數少過預期，而10月製造業PMI升至47.8，數據均反映目前再減息逼切性有限，今年餘下時間減息空間亦唔多。美股收市，道指跌140點或0.33%，報42374；標指升12點或0.21%，報5809；納指升137點或0.76%，報18415。
重磅股中，Tesla業績理想並唱好前景，加上特朗普於大選調查中有領先優勢，兩者帶動股價急升21.9%；Nvidia升0.6%；波音公司工人投票反對新薪酬方案，意味罷工行動持續，拖累股價挫1.2%。UPS收入和盈利近兩年來首次回復增長，股價升5.3%。不過，IBM上季收入增長乏力，股價跌6.2%，為跌幅最大道指成分股；大型金礦商Newmont上季盈利創5年新高，但仍遜預期，股價急跌14.7%。
分析：難就美國大選部署
貝萊德智庫主管Jean Boivin警告，投資者低估美國大選結果受到質疑嘅風險，可能出現長達數周嘅法律爭拗衝擊市場，坦言現時部署誰贏得大選係徒勞無功。聯儲局地區經濟報告「褐皮書」顯示，自9月初以來，美國大部分地區嘅經濟活動大致平穩，調查並提到美國大選係導致消費者及企業押後投資、招聘及採購因素。克利夫蘭聯儲銀行總裁Beth Hammack於演說中表示，雖然改善通脹方面已取得進展，但仍未可宣告工作完成，提到地緣政治及樓市繼續對物價構成上升風險。美國10年期債息一度回落6.1個基點，至4.183厘，對息口較敏感嘅2年期債息亦下挫4.41個基點，至4.0338厘，債息略為回落有利科技股，令隔晚納指表現跑贏。美滙指數最多跌0.4%至104.01，日圓最多漲0.79%至151.56兌每美元。
至於反映中概股嘅金龍指數偏軟跌0.82%，隔晚夜期及ADR亦走軟，今早黑期回落至20400水平，預期大市今早低開。港股昨日喺連續兩日反彈後回吐，全日收市跌270點，收報20489，5日及10日線匯聚區20600失守，成交則保持1652億元。
結算前消耗期權時間值
多名聯儲局官員呼籲放慢減息步伐，加上美國總統大選將至，市場憂慮一旦特朗普當選，有機會令通脹重燃，減息空間收窄，喺美債息上升、美元轉強下，對新興市場有一定影響，中港股市亦面臨壓力。恒指近期走勢反覆，短期料維持區間上落為主，暫時20000水平有一定支持，但要重返21000之上卻困難重重。呢幾日大市窄幅上落，喺下周期指結算前並未見明顯方向，似乎係窄幅上落，呢個走勢將會令下周結算嘅期權加快損耗時間值，喺市場唔明朗嘅情況下，暫宜觀望。
古天后
相關文章：
最新回應