騰訊業績唔算標青 阿里放榜難寄厚望｜古天后

美國7月份核心CPI連續四個月放緩，為9月聯儲局減息消除障礙，美股隔晚反覆上升，納指雖然盤中曾跌近1%，最終收復所有失地。美股收市，道指升242點或0.61%，報40008點；標指升20點或0.38%，報5455點；納指升4點或0.03%，報17192點。Google母公司Alphabet傳可能遭美國司法部要求拆骨，股價跌2.3%；Nvidia表現反覆，收市倒升1.6%。金融股有追捧，美國運通升2%，為表現最強道指成份股，高盛及摩根大通都升超過1%。美國食品公司Kellanova獲糖果巨頭Mars提出收購，股價升7.7%；瑞士銀行業績理想，股價升5.3%。

分析指股市未陷熊市跡象

摩根士丹利策略員Michael Wilson於彭博電視訪問中表示，即使季節性不利因素及增長前景不明朗，可能限制美股喺今季餘下時間嘅升幅，不過股市幾乎未見陷入熊市跡象，料標指喺5000點至5400點區間上落，波幅上限略低過現時水平，建議尋找個股投資機會，特別睇好防守性股份。高盛資產管理嘅多元行業定息收入主管Lindsay Rosner表示，最新CPI數字為聯儲局9月減息0.25厘清除障礙，與此同時，下調0.5厘嘅機會仍在。

美國7月份消費物價指數(CPI)按年升幅由6月3%放慢至2.9%，低過預期嘅3%，按月轉升0.2%，符合預期；期內撇除食品和能源嘅核心CPI按年增幅連續4個月放緩，從6月嘅3.3%回落到3.2%，係2021年初以來低位，與市場預測相若，按月升幅由6月0.1%加速至0.2%，同樣符合預期。勞工統計局指出，美國上月按月CPI增幅中，近90%來自住屋價格，升幅由6月嘅0.2%加速至0.4%，汽車保險價格漲1.2%，一籃子食品價格亦升0.2%，但能源、新車、服裝及機票價格回落。數據公布後，美國10年期債息最多回升2.46個基點，報3.8674厘，其後轉跌；息口敏感嘅2年期債息最多漲13.9個基點，至4.081厘。

亞特蘭大聯儲銀行總裁Raphael Bostic周二重申，聯儲局今年底前可能減息，但表明希望有更多數據支持相關行動，避免利率下調後掉頭回升。聯儲局
9月17日至18日下次議息會議之前，仍有大把重要經濟數據出爐，包括8月就業報告、7月個人消費開支平減指數(PCE)及8月份CPI。呢啲數據都會左右聯儲局嘅減息計劃。掉期市場顯示，交易員普遍相信聯儲局9月減息0.33厘，略低過周二嘅0.37厘，至於減息0.5厘機會率降至約三分之一，並繼續估計年底前下調超過1厘。美滙指數最多跌0.28%至102.27，日圓轉跌0.51%至147.58兌每美元。

雖然美股三大主要指數上升，但反映中概股嘅金龍指數則下跌1.63%，夜期跟ADR均見下跌，主要係騰訊(700)表面上交出一份理想業績，但睇真啲又唔係表面上增長咁強勁，主要係管理團隊執行力強勁，成本操控方面做得好，令純利超出預期，但公司仍要面對收入難以保持增長嘅風險。加上晚上跟分析員嘅業後會議上，表示目前就有關微信關於蘋果指小程序商家避交蘋果稅，要求騰訊整頓，否則將騰訊App從App store下架，此事正進行談判，呢個消息令騰訊股價由升轉跌，拖累夜期及ADR股價下跌，拖累夜期急轉直下，更一度跌穿萬七大關。

騰訊業績料未能提振大市

本來港股已一直受資金面薄弱問題困擾，呢個星期三個交易日，成交持續萎縮，大市由低位重返萬七水平之上，未見有新資金入場，而騰訊業績料未能提振大市。今早黑期已跌至萬七水平附近，預期恒指低開，如跌穿周初低位17002及10日線約16960料回復弱勢，回吐近日升幅一半下試16850點水平。至於早段能企17000樓上，或有望反彈上17100至20日線約17165，但可能反彈至5日線17067已見阻力。

古天后