周吉佩呻做到隻積被「老婆」欺凌冇飽飯食擴充音樂中心做到去廁所都冇時間丨獨家

2024-03-01 08:00

周吉佩(吉吉)在《中年好聲音》封王近一年，吸金過百萬，農曆新年前吉吉擴充了音樂中心，但在公在私幕後大老闆都係老婆黃彥欣，所有行政事務都交畀老婆處理。𠵱家兩公婆朝夕相對一齊做嘢非常開心，不過磨擦較以前多，吉吉希望新一年兩公婆少啲拗撬，可以融洽工作。採訪：方騫平攝影：朱偉彥

周吉佩和老婆黃彥欣同心合力經營音樂中心。

兩公婆床頭打交床尾和。

行政事務吉吉交畀老婆黃彥欣處理。

黃彥欣在公在私係吉吉老闆。

吉吉對藝術中心好有要求。

老婆眼中吉吉係藝術家。

周吉佩擴充的《好聲音中心》音樂中心，𠵱家生意都唔錯。

月前周吉佩開設的《好聲音中心》音樂中心，豪花6位數擴充及喬遷，𠵱家生意都唔錯，但老婆永遠覺得唔夠；吉吉有所「投訴」：「我話過每日最好教4至5個學生，畀小小時間我中段休息，點知佢日日如是，安排我由下午2時直踩到9時，連去廁所都冇時間呀！你知教唱歌係要做到足，冇得呃鐘㗎啦，返到屋企變咗人乾咁，咁夜連晚飯都冇得食。」黃彥欣即否認唔畀飽飯老公食：「你咪食完午飯先開工囉，係你自己戒食晚飯啫。」

周吉佩豪花6位數擴充及喬遷《好聲音中心》音樂中心。

吉吉工作多到不得了。

吉吉平時忙到冇啖好食。

之前兩公婆食青口慶祝結婚周年。

音樂中心生意唔錯，仲搞埋親子班。

老婆不滿形象被摧毀

吉吉還想當年：「多年前老婆話過想做我上司，話想差遣我，仲幻想我哋一齊工作狀況…估唔到𠵱家成真。」黃彥欣偷笑說：「係我想欺凌佢。」不過，黃彥欣坦言唔多習慣同老公一齊工作：「佢由頭到尾都當自己係藝術家，個人又執著又多意見，會問返我『點解咁做？想得到乜結果？』」語畢，黃彥欣爆吉吉係緊張大師，常追住問：「呢啲嗰啲執咗未？」又常點她吸塵及抹玻璃門：「我都唔明點解重覆又重覆咁做？」吉吉自爆近日兩公婆經常有拗撬，鬧得最多就係老婆怪佢態度唔好：「有時答佢『唔得閒呀』、『快啲講』…佢聽完會扯火，好彩嬲完好快冇事。」黃彥欣帶點不滿回應：「我形象畀你摧毀啦，講到我咁恐怖。」