《烏有之地》馬東石兵器大匯演丨頭條戲場

 

故事發生在電影《烏托邦浩劫》後3年，首爾仍然爛到原爆咁，兩套戲共用終極大地震中「生還」的皇宮公寓，因為有水有電，今次被科學怪醫霸住做人體實驗，但留意返，兩套戲內容完全無關連，只係共用世界觀，即末世加等死，但呢套多少少玩法，有韓國電影好鍾意的喪屍，加埋馬東石孭飛，無限量馬氏式重拳出擊，最鍾意電影元素齊晒，107分鐘打足80分鐘，收貨啦。見亞洲影評麻麻，又話悶又話冇內容，其實以Netflix電影質素嚟講算唔差，好彩爛番茄指數都有75%，睇嚟外國觀眾好滿意(已上架)  撰文:廖思慧    圖片提供:Netflix
 

馬東石簽名式重拳睇極唔厭。

知關、南山及安智慧飾演的隸屬特種部隊中士恩好，齊殺入公寓救人。

用刀可以慳啲力，斬手斬腳快靚正。

南山槍法都好準，面對成班喪屍全部爆頭唔使煩。

電影由《屍殺列車》及《犯罪都市》等多套電影的動作指導許明行首次執導，跟馬東石合作無間，處男作當然要搵返老拍檔。南山(馬東石飾)是大地震中的死剩種，因為打得又有腦擁有極強生存能力，負責末世保安工作，已經末世，大家都咁慘，仲有壞人?有，仲有好多添。

動作場面超狠
電影一開場，見到科學怪醫梁基秀(李熙俊飾)做緊急手術，有執法人員湧入叫佢停止，然後恐怖大地震殺到，從手術室的窗望出去，建築物逐個冧，鏡頭一轉，南山跟狩獵好兄弟崔知關(李濬榮飾)在廢墟捉鱷魚，唔使多解釋都知戲中世界發生咩事。跟婆婆相依為命的女主角秀娜(盧正義飾)被扮好人的壞人帶走，南山其後發現婆婆條屍，成件事通晒，即展開救人行動。

廢墟搵食靠自己，南山同知關合作捉鱷魚。

南山將鱷魚分畀街坊食。

秀娜由盧正義飾演，童星出身越大越靚。

特種部隊中士恩好揸槍好有型。

科學怪醫做人體實驗想個女翻生，但個女明明得返半截。

戲中有好多血腥場口，例如爆眼同甩頭。

無錯，呢個就係甩頭。

打鬥超多樣化

導演做開動作指導，所以動作場面設計相當豐富，由頭打到尾之餘，打鬥類別亦好多樣化，拳擊及巴西柔術，鎅頸又甩頭，仲有連場設計好有心思的槍戰，格鬥戰場由室外到室內，有廢墟有公寓長走廊仲有地下密室及超窄樓梯，加埋洗腦兼喪屍元素，盤菜咁乜都有，其實根本係一套以末日包裝的動作片，明明打鬥精彩睇得好爽，但又嫌劇情薄弱唔合邏輯，雞蛋挑骨頭真係好玩咩?
 

大地震後嘅首爾，非常唔適合人類居住，想生存要好有智慧。

特效做得好好。

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ