苑瓊丹瞓身帶貨息影5年:星爺叫都唔考慮笑談跟家燕姐陳年拍劇恩怨丨獨家

2024-03-01 07:00

60歲苑瓊丹演過唔少經典角色，包括石榴姐、龜婆、姚田氏等等，近年決定試新嘢暫時息影，未來5年會長駐直播界，就算周星馳開到口都唔會動搖，苑仔話好享受喺冇壓力嘅平台做女主角。另外，重談2003年拍《皆大歡喜》時裝版的風波，她坦言唔再嬲事件女主角，但同枱食飯就應該唔會嘞。採訪：方騫平攝影：譚志光場地：Nobel Hair Care

60歲嘅苑瓊丹最開心帶貨可以做返自己。

苑仔唯一嫌拍戲身不由己。

拍戲帶畀苑仔名和利。

苑仔希望喺最後衝刺階段試新嘢。

直播帶貨令苑仔得益良多。

入行超過40年，苑仔賺埋唔少，買車買樓，更經營生髮中心，17年來做到有聲有色。近年她又跟大隊，返內地做直播帶貨，出售滋補品、化妝品、服裝、日用品等，由一開始只得100萬營業額，4場後已火速過200萬人民幣，計埋有過百萬分佣，收入較拍戲更多。

苑仔經營17年的生髮中心做到有聲有色。

苑瓊丹享受做直播帶貨，可以做女主角好有滿足感。

未來5年苑仔都會投入直播帶貨。

唔覺藝人變Sales好折墮

60歲的苑仔自覺跟死神越嚟越近，所以想喺70歲前做啲有滿足感，又可以溫飽嘅新嘢，所以揀做直播帶貨，對於由藝人變做sales會被覺得好折墮，苑仔睇得好開：「搵到一份自己鍾意做嘅嘢，可以做返自己，又發掘到樂趣，開心冇壓力。」她又坦言唔係唔鍾意拍戲，但實在太被動，「自問冇辦法更上一層樓成為影后級，例如接咗個角色要喊，但好開心喎點喊呀？所以有時接劇本係會有壓力，明明好傷心變得要好開心；明明好凍卻要着比堅尼跳海…有身不由己感覺，𠵱家打自己工，直播中我係主角，唔使跟對手做反應及顧慮啱唔啱傾，唔使睇人眉頭眼額。」問到係咪退休唔拍戲？她堅持冇資格退休，講退休就會病：「但呢5年一定唔會拍，真係支持唔到拍戲時間，揀一樣鍾意做嘅事就專心去做，5年後可能變老弱殘兵，都拍唔到啦。」她說即使星爺開聲也暫不考慮，「除非係拍一日，但拍一日又拍唔到乜嘢出嚟冇乜意思。」

跟星爺合作電影《唐伯虎點秋香》闖出名堂。

電影《唐伯虎點秋香》做石榴姐。

電影《九品芝麻官》演龜婆3姑。

1983年的亞視出道作《鹹魚豆腐白菜仔》。

1984亞視《雲海玉弓緣》。

1986《西施》。

《封神榜》飾殷十娘。

演《真情》嘅低B瓊。

96年和朱咪咪、魯芬、袁詠儀電影《運財智叻星》。

2001年同陳奕迅、李珊珊拍《靚女差館》。

2010 跟郭峰拍TVB《情越雙白線》。

拍 TVB劇《火線下的江湖大佬》。

2017年跟黃一山合作拍電影《初戀日記：賤男蜜擾》。

《男親女愛》的梅日仙好搶戲。

可愛仙姐。

2019年的《街坊財爺》金牙嬌是TVB最後劇作。

前半生為拍戲勞碌如白活
除咗賺到錢，苑仔覺得從帶貨中獲益良多：「認識到新品種紅酒味提子、平啲嘅金車厘子、真髮菜係呈墨綠色且有彈性，帶點污垢嘅。相比拍戲只係用嚟消磨時間令人開心，演戲又要研究劇本，往往疏忽生活，似係白活咗，原來生活有好多知識及價值，自己買條蔥都會講價啦，想用一蚊買到兩蚊超值嘢，呢啲都想變做直播精神同人分享。不過，sell貨都唔容易，既有熱情又要有激情、人情、甚至動之以情，點解要幫襯你去買蘋果？又要買得多？就算出售一個蘋果都要讚吓佢，哈！當年掌握到呢啲技巧，待人處事都會圓滑啲，」好有生意頭腦的苑仔還打算開設訓練課程培訓直播帶貨人材，甚至在港建立直播平台。

苑仔曾去過細細粒直播間學嘢。

苑瓊丹曾為阿叻做馬拉松式直播帶貨，踩足15.5小時。

苑仔在內地做過包裝熟食生意。

近年苑仔將工作重心移至內地。

自認口臭教訓及經歷較多
重提21年前拍《皆大歡喜》的風波，當年苑仔堅持薛家燕入廠遲到兩分鐘起爭拗，苑仔笑住裝傻：「我唔知邊個係主角喎！回頭一望，唔係因為咁而心灰意冷，都唔會離開電視台返內地發展，今日唔會有咁過癮嘅直播機會，令自己水漲船高，做乜要當係一件慘事啫？應當係學習，只係多謝個經歷令我成長咗啫，教到我退一步海闊天空，唔好再喺傷口上灑鹽，如果當時仲鬼殺咁嘈及堅持只係唔放過自己，傷口只會越爛越大。」苑仔強調雖然有疤，但好快好返。問到有冇機會同枱食飯？她稱唔知點約到，「其實朋友約我都唔易，呢5年一定冇心，因為要努力做好事業。」苑仔坦認係口臭嘅人，經歷及教訓一定比別人多，問題受教後能否學到更聰明：「仲嬲呢個答案最冇意思，(會介意放喺個心度？)經已冇晒感覺，正如唔會介意幾日前打爛咗啲乜，只會記得發生咗件咁嘅事，人之常情嚟，否則係嚴重腦霧！哈…」