苑琼丹瞓身带货息影5年:星爷叫都唔考虑笑谈跟家燕姐陈年拍剧恩怨丨独家

2024-03-01 07:00

60岁苑琼丹演过唔少经典角色，包括石榴姐、龟婆、姚田氏等等，近年决定试新嘢暂时息影，未来5年会长驻直播界，就算周星驰开到口都唔会动摇，苑仔话好享受喺冇压力嘅平台做女主角。另外，重谈2003年拍《皆大欢喜》时装版的风波，她坦言唔再嬲事件女主角，但同枱食饭就应该唔会嘞。采访：方骞平摄影：谭志光场地：Nobel Hair Care

60岁嘅苑琼丹最开心带货可以做返自己。

苑仔唯一嫌拍戏身不由己。

拍戏带畀苑仔名和利。

苑仔希望喺最后冲刺阶段试新嘢。

直播带货令苑仔得益良多。

入行超过40年，苑仔赚埋唔少，买车买楼，更经营生发中心，17年来做到有声有色。近年她又跟大队，返内地做直播带货，出售滋补品、化妆品、服装、日用品等，由一开始只得100万营业额，4场后已火速过200万人民币，计埋有过百万分佣，收入较拍戏更多。

苑仔经营17年的生发中心做到有声有色。

苑琼丹享受做直播带货，可以做女主角好有满足感。

未来5年苑仔都会投入直播带货。

唔觉艺人变Sales好折堕

60岁的苑仔自觉跟死神越嚟越近，所以想喺70岁前做啲有满足感，又可以温饱嘅新嘢，所以拣做直播带货，对于由艺人变做sales会被觉得好折堕，苑仔睇得好开：「搵到一份自己锺意做嘅嘢，可以做返自己，又发掘到乐趣，开心冇压力。」她又坦言唔系唔锺意拍戏，但实在太被动，「自问冇办法更上一层楼成为影后级，例如接咗个角色要喊，但好开心喎点喊呀？所以有时接剧本系会有压力，明明好伤心变得要好开心；明明好冻却要着比坚尼跳海…有身不由己感觉，𠵱家打自己工，直播中我系主角，唔使跟对手做反应及顾虑啱唔啱倾，唔使睇人眉头眼额。」问到系咪退休唔拍戏？她坚持冇资格退休，讲退休就会病：「但呢5年一定唔会拍，真系支持唔到拍戏时间，拣一样锺意做嘅事就专心去做，5年后可能变老弱残兵，都拍唔到啦。」她说即使星爷开声也暂不考虑，「除非系拍一日，但拍一日又拍唔到乜嘢出嚟冇乜意思。」

跟星爷合作电影《唐伯虎点秋香》闯出名堂。

电影《唐伯虎点秋香》做石榴姐。

电影《九品芝麻官》演龟婆3姑。

1983年的亚视出道作《咸鱼豆腐白菜仔》。

1984亚视《云海玉弓缘》。

1986《西施》。

《封神榜》饰殷十娘。

演《真情》嘅低B琼。

96年和朱咪咪、鲁芬、袁咏仪电影《运财智叻星》。

2001年同陈奕迅、李珊珊拍《靓女差馆》。

2010 跟郭峰拍TVB《情越双白线》。

拍 TVB剧《火线下的江湖大佬》。

2017年跟黄一山合作拍电影《初恋日记：贱男蜜扰》。

《男亲女爱》的梅日仙好抢戏。

可爱仙姐。

2019年的《街坊财爷》金牙娇是TVB最后剧作。

前半生为拍戏劳碌如白活
除咗赚到钱，苑仔觉得从带货中获益良多：「认识到新品种红酒味提子、平啲嘅金车厘子、真发菜系呈墨绿色且有弹性，带点污垢嘅。相比拍戏只系用嚟消磨时间令人开心，演戏又要研究剧本，往往疏忽生活，似系白活咗，原来生活有好多知识及价值，自己买条葱都会讲价啦，想用一蚊买到两蚊超值嘢，呢啲都想变做直播精神同人分享。不过，sell货都唔容易，既有热情又要有激情、人情、甚至动之以情，点解要帮衬你去买苹果？又要买得多？就算出售一个苹果都要赞吓佢，哈！当年掌握到呢啲技巧，待人处事都会圆滑啲，」好有生意头脑的苑仔还打算开设训练课程培训直播带货人材，甚至在港建立直播平台。

苑仔曾去过细细粒直播间学嘢。

苑琼丹曾为阿叻做马拉松式直播带货，踩足15.5小时。

苑仔在内地做过包装熟食生意。

近年苑仔将工作重心移至内地。

自认口臭教训及经历较多
重提21年前拍《皆大欢喜》的风波，当年苑仔坚持薛家燕入厂迟到两分钟起争拗，苑仔笑住装傻：「我唔知边个系主角喎！回头一望，唔系因为咁而心灰意冷，都唔会离开电视台返内地发展，今日唔会有咁过瘾嘅直播机会，令自己水涨船高，做乜要当系一件惨事啫？应当系学习，只系多谢个经历令我成长咗啫，教到我退一步海阔天空，唔好再喺伤口上洒盐，如果当时仲鬼杀咁嘈及坚持只系唔放过自己，伤口只会越烂越大。」苑仔强调虽然有疤，但好快好返。问到有冇机会同枱食饭？她称唔知点约到，「其实朋友约我都唔易，呢5年一定冇心，因为要努力做好事业。」苑仔坦认系口臭嘅人，经历及教训一定比别人多，问题受教后能否学到更聪明：「仲嬲呢个答案最冇意思，(会介意放喺个心度？)经已冇晒感觉，正如唔会介意几日前打烂咗啲乜，只会记得发生咗件咁嘅事，人之常情嚟，否则系严重脑雾！哈…」