獨家丨薛影儀「X」出禍「一姐」生涯玩完損友黃榕廣發訊息助搵工洩被炒

2023-10-17 07:00

薛影儀被損友帶壞事件滿地花生，阿儀為維護「好朋友」黃榕，公開臭罵經理人林寶玉係「賤X」、「仆X」後直入雪櫃。上周四(12/10)晚，林寶玉在社交平台宣布離開AMM(亞洲心動娛樂)，及後解釋因能力達不到公司要求。《頭條日報》收到獨家消息，因為AMM認為阿儀多次失控「跳掣」影響公司聲譽，又盜用公司IG犯錯，屢勸不改決定將她解僱，經理人無用武之地，簡單嚟講林寶玉俾阿儀累死，兩人同日離開AMM。阿儀由亞視撈到AMM，上周四正式告別兩年零3個月嘅「一姐」之位。採訪：方騫平

以阿儀的姿色可以由「亞視一姐」跳到「AMM一姐」，的確是娛圈奇葩。

林寶玉慘成為阿儀的陪葬。

上周「最索經理人」林寶玉發文宣布離職AMM，文中表示要走向下一個冒險，又透過傳媒祝福阿儀前程錦繡，事件耐人尋味。《頭條日報》收到可靠消息，AMM覺得阿儀被雪到硬晒仍然死性不改，再冇空間畀機會，故狠心一刀切提前終止她的藝人合約，連合約期內需要支付嘅基本底薪都慳返。據知，阿儀已獲通知，要她秘密地返公司收「大信封」。由於踢走「犯錯KOL」阿儀，AMM再冇需要超級經理人職位，原先打算將林寶玉調職，但有樣有身材嘅林寶玉決心重返幕前，故堅持辭職。

阿儀為維護黃榕係好人，公開臭罵經理人林寶玉。

林寶玉有樣有身材，好多網民都讚成她重返幕前。

兩年多前，阿儀參加亞姐選美面試被發掘。

上周林寶玉突然在社交網發文宣布離職AMM。

阿儀好Enjoy拍戲，兩年前跟孫慧雪拍《愛．還記得》笑得好開心。

阿儀屢勸不改，繼續盜用公司IG放同公司冇關嘅玩樂相，成為被炒關鍵。

阿儀唔想轉行
阿儀加入「失業大軍」，名正言順坐正做「監護人」嘅黃榕連日來不停為阿儀四圍搵工，變相洩密，有幕後人向《頭條日報》報料，由「香港著名損友」變身「榕媽」的黃榕已搵中間人搭路，傳訊息向多間電視台高層招手，更表達阿儀想拍劇及做節目，訊息如下：「阿儀今日(周四)已終止咗(AMM)合約，佢想拍吓電視，睇吓有冇機會能安排一吓。」不過，電視台高層聽到阿儀個大名都嚇親，耍手擰頭話咪搞，坦言，「唔想接觸佢，語出驚人又粗口橫飛，最驚成為下一個被公開臭罵嘅人。」

以後唔再合作
上周六，《頭條日報》獨家報道林寶玉公開訊息內容踢爆黃榕講大話，其後阿儀在社交網回應亦暗示已被炒及披露未來想發展方向，她說：「我在AMM嗰陣去過馬拉幾次…」又指日後想做主播及拍嘢。《頭條日報》短訊追問阿儀：「被炒後有乜打算？會否唔捨得一姐光環？」阿儀一概已讀不回，直至問到：「怕唔怕之前語出驚人，嚇怕其他公司唔敢用你？」阿儀信心滿滿秒回：「唔怕！」而林寶玉就避談阿儀係咪已被炒，只說：「唔係太清楚，因為我已經唔能夠決定公司嘅事。」另外，兩人接受訪問時均表示，冷靜過後唔再嬲對方，既然兩人先後離開AMM，問林寶玉日後會否有機會再續前緣，做返阿儀經理人？寶玉即落閘：「唔會考慮嘞！希望阿儀都有好嘅發展，祝佢前程錦繡、開心快樂。」