古天后日誌｜港股後市走勢取決於萬八關能否守穩
2023-08-29 10:41 
港股｜8月29日，大致多雲，有幾陣驟雨，局部地區雨勢頗大，日間短暫時間有陽光，天氣悶熱。隔晚美股持續向上，標指早前回試4,300點水平搵到支持，市場氣氛改善，標指重上4,400點水平暫靠穩，隔晚再升27點；道指則升213點；納指更回升114點。VIX稍見17危險警界線再度回落，重返15點水平，市場未見恐慌，回調時成交亦縮減，反映持貨者惜貨如金，市場繼續逢回調吸納。
呢個星期將有大小非農數據公布，周五則公布PCE指數，預期喺上月CPI回升下，PCE將反彈，但市場已完全消化。由於數據反映美國經濟仍然強勁，聯儲局不得不繼續加息，雖然9月未必再加息，但年底前或可能再加息一次。目前市場可能由之前炒減息，轉為炒經濟反彈，事實上年初唔少人預估美國經濟陷入衰退，或呈橫向發展，於低位整固，更有預測指美國全年GDP增長只有1.5%。但出嚟嘅數據，第一季土GDP係1.8%，第二季更升至2.6%，預估今年美國經濟陷入衰退嘅人，跌到一地銀鏡。而近日亞特蘭大銀行甚至將Q3預測由3.55%調升至5.91%，即係美國經濟可能出現V型反彈，呢個亦係美股高居不下嘅原因。
至於港股呢，噚日喺內地公布下調50％股票交易印花稅後，市場憧憬香港呢邊會唔會蹆住阿爺走，港府雖未有即時行動，但特首則宣布會成立專責小組研究增加港股流動性，並盡快公布細節，冀能於10月《施政報告》前向他提供建議，而市場聲音普遍係要求減股票交易印花稅，以及將港股買賣單位改為一股一手，以降低入場門檻，增加靈活性。
消息刺激港股大幅高開超過500點，最高見18,564點，剛好回補8月中下跌裂口，無奈高開走低，收市升幅削半至僅剩174點，報收18,130點，大市成交金額1,010億元，呢個成交當然配合唔到升勢，加上一開就回頭，反映市場係趁好消息出貨，都唔等佢港府係咪稍後有所行動，市場內只有炒家，唔見買家，對港股嘅信任度之低可見一班。
隔晚美股續升，夜期跟ADR回升，夜期重上18,300點水平，預期今日港股高開，升149點，高水169點。ADR港股比例指數升144點，收報18,275點，預期恒指今早高開，短線阻力喺18,400點至18,500點，若然能夠企穩18,300點水平，自然再向阻力挑戰，有望結束跌勢，箇組升浪。相反又係高開低走，要睇18,000點水平守唔守，守唔到嘅話，代表港股呢一輪跌浪尚未完結，短期弱勢未改，仍要繼續向下尋找支持。
相關文章：
港股市況｜恒指高開130點 恒大急跌14% 美圖績後升2.4%
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應