古天后日誌 ｜港股反彈僅見小量資金流入 已淪為大戶炒指數賭枱

港股 ｜8月24日，大致多雲，有幾陣驟雨及雷暴，下午短暫時間有陽光。隔晚Nvidia收市後公布業績，美股未等業績公布先偷步向上，三大指數上升，道指升184點，標指跟納指分別升48點及215點。標指成功守住4,300點重要支持後，又重返4,400點水平之上，雖然美股目前估值唔算平，但市場憧憬明年美國經濟向好，持貨惜貨如金唔願沽，令美股高居不下，VIX又重返17點之下，淡勢未成。

收市後Nvidia第2季收入135億美元，同比增長101%，遠高於市場預期的110億美元，數據中心收入逾100億美元，同比增長170%，遠高於預期79.8億美元，每股盈利2.7美元，同樣優於預期嘅2.09美元。Nvidia盤後最多升10%，暫時升6.5%，料今晚又可帶動其他科技股上升。

周末環球央行舉行Jackson Hole會議前，歐洲交易員預期9月加息機會由60%降至40%，主要係歐洲商業活動連續3個月急速萎縮，德國10年債由2.72%跌至2.52%，美國10年債息由4.36%回落至4.19%，債息回落亦係帶動美股隔晚回升原因。雖然美國經濟未如預期中衰退，但目前CPI回落至3.3%，加息至已足夠壓制通脹上升，若再強行加息，或會加深環球債務危機。上半年美國已出現18宗債務違約，總額達210億美元，已超過2021年及2022年兩年總和，目前美國垃圾債券總值達1.4萬億美元，長期高息令更多質地麻麻嘅企業難以生存。

港股開始A股化 淪大戶炒指數賭枱

中概股噚日亦跟美股反彈，不過動力一般，不過恒指今日有望重返萬八水平，今次由20,300點水平回調至18,000點水平之下，成交回升至過千億元，反映有少量資金開始趁低吸納，外資由舊年開始撤離，都走得七七八八，手上再無咁多現貨要沽，依家只係大戶炒住個指數上上落落。

古天后早喺三年前已講過，港股開始A股化，只有大戶做好做淡兩邊搞，進入長期有波幅，冇升幅嘅模式，尤其加咗印花稅之後，完全係趕客格局，而香港嘅國際金融中心地位亦漸退色，如此境況下，又可以對港股有乜嘢期望，不過係一張賭指數上落嘅賭枱，融資功能大不如前，過往一直相對其他交易所有較高溢價嘅港交所（0388），未來應該再難維持高溢價。

相關文章：

港股市況｜恒指高開146點試萬八關 百度升近3% 友邦績後升2.5%

英偉達收入勁升101% 盤後急升10%見518美元 CEO黃仁勳：AI競賽已開始

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ