獨家丨尹光曾墮台跌斷手葉振棠險跌落窿舞台危機四伏重提遇險經歷

2022-08-31 06:57

環星娛樂成立20周年，老闆張國林指疫情下更需要娛樂，之後葉振棠、尹光、方伊琪及莫旭秋等會陸續開Show，也答應經理人方俊為張偉文申請紅館個唱。就MIRROR紅館演唱會嚴重事故，曾於38年前在新加坡演出期間墮台，導致左手手肘斷骨的尹光感受良多：「對MIRROR嚟講係非常大打擊！」而弱視嘅棠哥自爆喺《輝黃2000演唱會》中幾乎叉錯腳出事，上台表演原來充滿危機。採訪：方騫平

尹光及葉振棠講起曾遇舞台意外都仍然驚驚。

環星老闆張國林答應經理人方俊為張偉文申請紅館個唱。

因為意外事故，MIRROR要休團兩個月。

日前，環星娛樂老闆張國林率「一哥」尹光、葉振棠、Joe Junior、張偉文、方俊、「黑妹」李麗霞、黃翊、方伊琪及莫旭秋等共20位藝人，為《星級靚聲演唱廳》20周年特輯做直播，每人送上一首歌來賀壽。原來棠哥於環星娛樂成立前經已同張國林合作，而尹光亦跟咗老闆17年，張國林對尹光呢位老臣子信心十足：「佢可以再簽多十年畀我，就算老到冇牙都可以繼續唱。」

張偉文(前左一)、葉振棠(前右一)、張國林(後左一起)、方俊、尹光、方伊琪、莫旭秋對音樂好有熱誠。

當晚黑妹姐(李麗霞)都撐場做直播。

張偉文直播時狀態大勇。

尹光曾遇兩次舞台意外
72歲尹光堅持只要一日保持到靚聲，都永不言休，提到MIRROR的紅館Show嚴重事故後，12子休團兩個月來調整身心及疏理情緒，尹光明白到舞台演出有一定風險，他同樣中伏兩次：「09年嘅紅館個唱唔記得走位，企喺個升降台位繼續講嘢，直至升降台開始降落，我就馬上跳返上去，嗰次及時執生冇乜問題，最大件事反而喺1984年為新加坡一個賀年節目演出，原先一連做12日，點知第5日出事。」

尹光愈唱愈起勁，唔打算退休。

尹光憶述意外時仍覺驚驚：「因為現場反應太熱烈，又唔知咁先進，大會用緊有伸縮性嘅電動樓梯，加上啱啱有激光射住，我就好興奮咁行埋去鋪咗紅布嘅樓梯位置，豈料當時樓梯經已收返入去，我成個人踏空墮地，即被人抱返入後台再送往醫院，嗰時雖然得40幾歲，但都跌散咗，留院10幾日，仲要坐輪椅返港，一年後喺香港再開刀拆鏍絲，真係好大件事，不過，因為同老闆關係好好唔使賠償。」

09年尹光紅館個唱，因為顧住講嘢走錯位而發生小意外。

在新加坡墮台跌斷手，好返後隻手掂唔到膊頭。

諗起壓傷舞蹈員好傷心
至於葉振棠喺《輝黃2000演唱會》中因為被激光射住睇唔清楚行到去邊，只差兩步就變成林子祥跌落窿大事件：「嗰次真係好危險呀！好彩耳機及時提醒叫我停步。」疫情下已停工兩年，棠哥坦言𠵱家要追返啲收入：「舞台危機四伏都冇乜辦法，唯有小心啲，開場前睇清楚啲機關係邊。」尹光就收起搞笑，嚴肅地說：「意外冇人想，見壓傷舞蹈員個個都好傷心，人命嚟！」張國林話：「最慘見到MIRROR就聯想到意外情景，希望大家可以盡快淡忘！」