梅媽否認被禁錮鬧爆梅啟明 揭衰仔美國留種仲有兩個仔

已故香港天后梅艷芳母親梅覃美金早前登報與兒子梅啟明脫離母子關係，梅啟明指控姪兒梅柏麟濫用梅媽每月25萬元的生活費，私人看護「鄭姑娘」則壓迫梅媽登報與他脫離母子關係，日前入稟高等法院向梅柏麟申索500萬元，另向「鄭姑娘」申索300萬元，告上法庭向他們索償合共800萬元。但根據司法機構網頁顯示，案件暫未有聆訊排期。被梅啟明指遭姪兒及看護禁錮的梅媽昨天接受D100節目《娛樂小奶媽》主持潘小文訪問時，否認遭人軟禁，節目播放的梅媽錄音對話，梅媽提到個仔梅啟明相當勞氣，激心激到係咁咳，又形容(生)4個仔女中呢個衰。節目中梅媽更力數他不停苛索要錢錢錢，仲窮風流，四處留種︰「佢喺美國...有『蘇州屎』，仲有兩個仔！真陰功囉...」

梅媽昨天接受D100節目《娛樂小奶媽》主持潘小文訪問時否認遭人軟禁。(D100《娛樂小奶媽》潘小文圖片)

梅媽講到個梅啟明就好激心。

係咁索錢永無寧日
被梅啟明指遭姪兒及看護禁錮中嘅梅媽接受D100節目《娛樂小奶媽》主持潘小文訪問時強調自己雖然有啲唔舒服，但係清醒，仲第一時間力撐看護鄭姑娘照顧得她好好：「鄭姑娘好到搵唔返第二個。」被問到禁錮一事，99歲的梅媽中氣十足反問︰「邊個想禁錮我！佢（梅啟明）想禁錮我就真，所以我先要避佢，搬到咁遠呀，因為佢成日都追住話︰『喂，錢呀錢呀錢！』永無寧日。你話一個月畀一萬、二萬、三萬，固定咗我可以做得到，我都會做，但你唔係喎！攞錢冇固定時間，你叫我點到呀？我都係靠阿梅(遺產)嗰啲啲做生活費，我又租樓，呢度都兩萬幾蚊租。」

梅媽話梅啟明眼中只有錢錢錢。

梅啟明指梅媽遭姪兒及看護禁錮。

主持潘小文再問梅媽一次︰「你𠵱家有冇畀人禁錮？有冇畀人鎖喺間房，鎖喺屋唔畀你出街？」梅媽語帶堅定話答︰「全部冇呢啲咁嘅事！唉，佢鍾意點講就點講，我都唔識講，自己生個咁嘅仔。」

梅媽受家事困擾變得憔悴。

唔信孫仔身患重病
提到梅啟明早前指14歲的兒子身患重病，急需要梅媽「放水」為兒子醫病。梅媽即說︰「我唔信佢，你叫佢畀我睇吓，佢(孫仔)睇咩醫生，畀醫生紙我睇吓，我盡我自己可能，幫得多少都幫。佢𠵱家老婆同仔都唔顧，仲四圍去住攬女人，唉，我都唔識講，自己生咗咁嘅仔。以前佢都仲去做吓嘢，直至識到嗰啲女人更加無聊...」

梅媽好錫個孫仔。

美國『蘇州屎』有兩子
梅媽又鬧爆個仔：「幾十歲仲去搵女人搞搞震，（我）啲錢好辛苦㗎，阿梅啲錢(遺產)係用嚟做生活費㗎，唔係畀你拎出去玩女人㗎！你有錢去玩你個事，我每使一毫子都係阿梅嘅辛苦錢。」對於梅啟明「包二奶」，梅媽嬲到爆話：「佢有錢包10個都唔關我事，我講明，玩女人我一毫子都唔會畀錢你。」當問到以前有冇試過「包二奶」？梅媽指他以前唔係香港，會四圍去，還爆料他四處留情及留種：「佢喺美國又有『蘇州屎』，仲有兩個仔！真陰功囉...佢風流，咩唔風流呀。」

去年8月梅啟明被本報踼爆，搭上泰國情婦May May。

梅媽又稱，其實兩個月前先畀咗10萬蚊畀梅啟明，因為他鎖住間屋唔肯交返畀業主，最後取走咗10萬按金及上期，但𠵱家應該使晒。以往梅啟明多次問人借錢，欠債由她償還，但還完再借過，只好脫離母子關係。最後梅媽無奈說：「唉！我4個仔女，係呢個最衰，佢以前細個唔係咁，都唔知佢群到咩人變晒。」

正室Joey對梅啟明死咗條心，已帶埋個仔返大馬娘家。

梅啟明帶埋陳玉娥稱急於找梅媽幫忙。

梅媽最錫兩個已故孝順女梅艷芳及梅愛芳。

立即下載 | 全新《星島頭條》APP : https://bit.ly/3yLrgYZ