披荊斬棘2丨林峯吳卓羲內地人氣急升連帶自爆初入行捱苦舊片翻hit

2022-08-30 07:00

林峯和吳卓羲近日參與內地綜藝節目《披荊斬棘2》，結果令人氣急升不少，因而令二人於18年前合作的TVB劇集《大唐雙龍傳》再次在網上翻hit ，而TVB日前亦趁勢在抖音上載二人於09年接受節目《星星同學會》訪問時的片段，同樣被網民瘋傳。

林峯（右）及吳卓羲因參與《披荊斬棘2》，令兩人在內地的人氣上升不少。

節目中兩人依然十足孖公仔一樣。

節目中二人憶述「小生未紅前點捱」，主持人吳君如問林峯和吳卓羲：「未紅時捱得辛唔辛苦？」林峯即指著吳卓羲說：「我同佢捱得好辛苦！」吳卓羲又指入行時甚麼也不懂，曾被嫌棄「阻頭阻勢」，他當時表示：「可能講一兩句對白都會口震，又唔知道啲光會遮住咗人哋，又遮住咗自己，導演就撳咪講：『喂！你識唔識拍戲㗎？』」同場的苗僑偉（三哥）即笑言：「當然有兩句粗口咁樣！」吳卓羲即否認：「冇冇冇！」場面搞笑。

不少網民都紛紛留言表示：「兩位都咁靚仔，應該唔使點捱」、「林峯咁有錢點使捱」、「兩位今時唔同往日喇」、「苦盡甘來」。