MIRROR演唱會｜Error@193遭網民私訊挑機質疑「唔發聲」郭嘉駿爆粗反擊

2022-08-12 14:55

Mirror演唱會上月28日發生舞台意外導致兩名舞蹈員受傷，其中一人仍留醫深切治療部。不少鏡粉不滿MakerVille行政總裁兼香港電視娛樂有限公司董事會成員魯庭暉未有公開詳細交代事件，甚至有人遷怒於該公司旗下組合Error成員郭嘉駿(193)。

有Facebook群組連日來發文炮轟ViuTV及MakerVille不負責任，較早前更有群組內成員透過社交平台，私訊郭嘉駿(193)「挑機」觸發罵戰，更將對話截圖在群組內分享。該名私訊193郭嘉駿的網民先指：「你唔係好敢言嘅咩，做咩唔出嚟話下你公司啊」，又指「你老母生到你牛高馬大淨係識恰啲幾十歲同𡃁妹」、「唔敢啊，抵你咁乞人憎」等等。

193對此隨即回覆說：「你係咪精神有問題」、「你覺得我係時事評論員？」、「我咩都要評論嘅咩？」、「我鐘意講乜就講乜㗎啦」、「使唔使你批准啊」。其後更說：「如果冇咗鍵盤，我諗你連垃圾都不如！」。雙方對話隨即變成罵戰，網民後來指「會（將對話）post去俾其他傳媒」，193則回應：「你咪post囉，唔post正垃圾，post完記住send番條link俾我。」雙方在言談間都包含粗口。

在雙方對話截圖於網上瘋傳後，大部份網民都認為，主動私訊193的網民行為無聊幼稚，直言「Pm佢嗰個都幾無聊」、「以事論事，今次193無問題喎，pm條友白卡先撩者賤攞嚟x」。不過，亦有網民認為193根本無需回應，認為作為藝人應慎言及訓練高情商。