MIRROR演唱會丨黃冠斌評花姐處理事故言論排序錢都係比安全重要？

2022-07-30 17:00

MIRROR演唱會發生嚴重意外，造成兩名舞蹈員被壓傷引起全城關注，不少網民都將矛頭直指主辦方，亦即是與ViuTV屬同一集團的MakerVille，批評他們把關不力，亦質疑他們為賺到最盡，將成本壓至最低而間接造成今次意外。

MIRROR演唱會因意外而腰斬。

大屏幕墮下令兩名舞蹈員受傷。

前港台及商台DJ黃冠斌，現職網台D100主持，昨日（29日）他於其網上直播節目《黃冠斌勿認真Why So Serious》中談及MIRROR紅館騷意外，「我形容為香港開埠以嚟，非常罕見亦都不能接受的意外。」同時亦代其節目的台前幕後人員以最真誠的祝福，希望受傷的舞蹈員平安。

黃冠斌於網台節目中評論事件。

其中一名受傷舞蹈員阿Mo（右），進行了兩次手術，情況仍然嚴重。

黃冠斌認為是次意外可謂一石激起千重浪，可從中反思香港娛樂圈產業文化的轉變，「第一，呢件事喺製作層面是完全不能接受嘅情況。第二，事件發生後，其實有關方面，特別是主辦方，佢做嘅工夫、工作，我本人認為相對上係比較遲緩或者係可能比較少嘅。因為佢哋啲歌迷、睇到騷嘅朋友，或者知道呢個消息嘅人，其實都需要知道更多嘅資訊，同埋大家都會有一千萬個點解。點解一個紅館演唱會得咁少時間去準備？點解一個紅館演唱會準備嘅質素會係咁參差？」加上開騷前很多人都留意到是次演唱會的不足，黃冠斌更問道為何不延遲演出將舞台處理到安全才開騷。而他亦撇除政見，認為今次政府的反應快，比主辦方處理得好，而且他亦認為康文署租出場地，除非場地本身有安全問題，如若是已交由主辦方製作舞台及舉行演出，當中的安全問題，主辦方是有需要承擔責任。

黃冠斌批評主辦方處理事件反應慢。

另外，黃冠斌亦批評主辦方在事故發生當下的處理做得不理想。首先大屏幕墮下後，大會竟然選擇將現場燈光關閉，有機會阻礙救援。而MIRROR經理人花姐（黃慧君）當時叫現場觀眾即時離開，他認為此舉同樣有阻救援，因為太多人同時離開，好大機會阻礙交通，令救護車延誤到場，「疏散一萬人最快都要3個字（15分鐘），而呢3個字會唔會就係救援最重要的時間呢？」而花姐隨即就表示會處理當晚門票的問題，被現場歌迷批評並非錢的問題，及後花姐才承諾會安全地處理事件，黃冠斌認為人在遇上突發事時的反應最直接，因而覺得花姐言論的排序上似乎已看出團隊當下仍然認為金錢比安全重要。