獨家丨譚俊彥望三代同堂去旅行珍惜跟家人相處時光

2022-07-30 07:00

譚俊彥（Shaun）最近首次出任月餅代言人，廣告中他飾演經常離家工作父親，傳統節日特別想回家跟家人團聚，他認為正是他生活寫照，亦令他想到小時候離港留學時，家人不在身邊的感受，所以現在會特別珍惜跟家人相處時光，更期待疫情退去，可以三代同堂去旅行聚天倫。採訪：杜杜攝影：沈健程　髮型：Franco Chung@Leonardo 3 HairCorner　化妝：Soie Ip　服裝：Theory　場地：Lawry’s The Prime Rib, HK

Shaun拍廣告時，聞到蓮蓉味即想起童年時跟家人過中秋。

廣告中跟小演員合作，身為一對子女爸爸的Shaun，駕輕就熟。

首次為傳統食物代言，令Shaun特別興奮，「拍廣告時，我一聞到蓮蓉味，就諗起細個同公公婆婆一齊過中秋，諗到嗰種味道就會諗返起同親人最開心嘅時候，疫情維持咗咁耐，可以好正能量咁參與到呢個廣告，帶到一啲親情訊息畀大家，我都好榮幸。」

Shaun小時候跟爸爸狄龍、公公、婆婆和姨姨一齊慶祝生日。

靠聽屋企直播撐住

Shaun經常要長時間離港工作，早前到內地為劇集《隱娘》開工加上要隔離，一去就大半年，他直言很掛念家人，幸好現在科技先進，所以更加明白當年父親狄龍感覺，「我同爸爸都係做嘢時會好專注工作，所以𠵱家我明白佢嗰時係冇辦法，仲要冇咁多科技，電話都講唔到，我𠵱家仲可以視像已經好好多啦！我會一路同啲小朋友溝通，參與屋企嘅運作，譬如做gym、跳步，我都會一路開住視像，睇唔到都聽住佢哋把聲，聽吓個仔練琴，起碼覺得成個屋企係撐緊我。」

離港開工時，Shaun會靠視像與家人維繫感情。

之前Shaun因離港工作，未能教囡囡踩單車，近日終於可以了。

曾離家一個人到外地讀書的Shaun，直言是個不能單身生活的人，所以當了爸爸後，會更加珍惜跟家人相處時間，「我承認做咗爸爸後，會比較想同爸爸關係更好，以前啲人成日話我係爸爸嗰仔，好似個陰影咁，𠵱家我覺得，人哋愈講我愈會攬住我阿爸𠻹！因為佢𠵱家身體仲好好，又可以三代同堂，成件事唔會理人哋點講，我淨係想好好享受呢個階段。」現在他最希望疫情完結，請晒全家去旅行，「但係𠵱家呢個係大事嚟，之前我本來有邀請過佢哋去日本嘅，但係最後冇去到，爆疫情之後都冇機會三代同堂去，但係呢個隔離我真係完全計劃唔到。」