古天后日誌｜內銀股下半年撥備料大增

7月15日，部份時間有陽光，間中有幾陣驟雨。美股表現繼續反覆，道指跟納指分別跌142點及11點，不過早段一段跌逾200點嘅納指，最終收復失地，收市倒升3點。美股單日波幅愈嚟愈大，同時成交亦開始縮減，反映市場流動性減少際，資金喺市場流動時間加速，由日升日跌轉為半日升半日跌，缸邊友明顯傾向短打游擊，資金唔願喺市內停留。

踏入業績期，JP Morgan率先派發銀行股業績表，喺壞帳上升下，JP盈利倒退28%，收入大減同時撥備增加，經濟衰退下，作為百業之母嘅銀行股，生意難做。乜嘢加息要買銀行股，因為息差拉闊呢啲想法，實在唔少得，尤其經濟衰退下，銀行股點會有運行。JP講到明為咗要留現金，唔會進行回購，連一向支持股價嘅必殺技都用唔到，你話幾咁悲。

緊隨CPI公布後，PPI出嚟嘅結果係11.3%，呢啲通脹據，已令到市場預測本月聯儲局加息0.75厘轉去加息1厘，而加拿大央行已率先出手，將利率上調1厘，觸發市場估計加息1厘恐怕變成常態嘅疑慮。聯儲局已多次強調目前首要任務係抑壓通脹，呢個月加息1厘嘅機會大增，就連一向鴿派嘅聯儲局官員，都轉咗口風，加息1厘並非無可能。聯儲局主席鮑威爾亦好清楚，若物價未能穩定，美國經濟好維持強勁，及可持續嘅方式增長。

內地停貸斷供事件續發酵

至於內地停貸斷供事件繼續發酵，不過內地一直強調要穩經濟，呢個問題獲中央高度重視，而阿爺日內將跟各大銀行開會，商討對策，估計都係要求銀行揼水畀內房企業繼續開工，以解決爛尾樓問題。不過內地民眾斷供，除咗係擔心項目爛尾，要供死會之外，失業率上升，無工開，無收入，又何來有錢供樓花，呢次內地除咗要解決爛尾樓問題，經濟上嘅問題未能解決嘅話，將會威脅到社會穩定，喺相關問題迫在眉睫下，即管睇睇阿爺如何出招應對。

暫時內房物管股嘅氣氛仍然偏淡，至於內銀就更加大鑊，雖然間𣄽銀行都話供斷事件目前風險可控，但個別內房還唔到貸款，民眾又斷供，奇怪嘅係上半年內銀股未見作大幅撥備，但問題出作嚟，真係可以當無事發生，預期下半年內銀股不得不增加撥備，盤數有幾好睇，大家心中有數。過往唔少缸邊友，鍾情買入內銀股收息，但每次經濟出現問題，有或者任何一個行業缺水失救，內銀必定要負起救亡重任，2015年內地股市出現溶斷，大量中小企出現財政問題，未能償還貸款，當時內銀就唯有收股票當係收返啲貸款，但呢啲企業直到依家都係殭屍企業，與其話銀行係收息股，不如話內銀係收屍股。

古天后

(徐狄怡，證監會持牌人)