雲浩影舊式陰森商場拍新歌MV 器材連環無故失靈嚇壞全場

2022-07-13 23:45

雲浩影（Cloud）早前以多個可愛造型拍攝新歌《到了那裏就對吧》MV，拍到凌晨時份，轉到一個舊式商場內取景，店舖都已關門關燈，商場本身的燈光又非常昏暗，氣氛迷離，拍攝期間器材更連環短暫失靈，燈光亦無故又開又閂，工作人員見狀即大叫：「唔好意思，我哋好快拍完㗎嘞。」說畢燈光立即回復正常，事後Cloud坦言當時埋位時也不自覺說「我淨係想順利收工。」結果順利完成，鬆一口氣。

MV其中一部份在一個商場拍攝。

拍攝時有器材無啦啦失靈。

Cloud嚇到埋位前都講想順利收工。

雖然拍攝場地冇冷氣，又熱又焗，不過Cloud著上毛衣拍攝都毫無怨言，而作為「MV初哥」，首次與其他演員做對手戲，她顯得特別緊張頻頻NG，Cloud說：「我第一次拍MV被咁多人望住，好緊張，點知仲要NG，真係好尷尬。但佢哋真係好好，無怪我，而且每位都好專業，我有靜靜雞偷師！」Cloud表示新歌首次由主唱到和音一手包辦，坦言是一次很特別的經驗。