古天后日誌｜港股虛火粉飾或實有資金捧場暫未確定

6月29日，部分時間有陽光，有幾陣驟雨，下午酷熱，留意周末期間天氣將轉差。隔晚美股先升後回，道指單日高低位接近千點，早段曾升446點，但不敵疲弱嘅消費者信心指數，中段開始倒跌，全日跌491點；標指跟納指跌逾2%，分別跌78點及343點。

世界大型企業研究會公布，美國6月消費者信心指數跌至98.7，按月跌4.5點，低於預期的100.4，創自去年2月以來最低，喺高通脹憂慮下，導致消費者預計今年下半年美國經濟增長將會大幅放緩。6月消費者預期指數由5月向下修訂嘅73.7，跌至66.4，創2013年3月以來最低。消費者1年通脹預期為8%創新高，高於5月向上修訂後7.5%。

古天后已講過喺美股再次步入業績期後，必再受考驗，即使好似Nike交出一份優於預期嘅成績表，管理層預期今年營收有低雙位數增長，再加上加碼回購，股價理應向上，但Nike股價先升後跌，反映市場傾向好消息出貨，而過往美股喺回購消息下例升嘅情況亦不復見，殺手繝已失效。美股單日咁大波幅，反映前仍處於熊市之中，而上周嘅反彈力度，亦開始減弱，始終喺高通脹及債息高企下，資金唔會太積極喺市場掃貨。

至於中港兩地股市，喺半年結效應下，表現尚算堅挺，尤其港股喺回歸25年效應下，市場期待領導人訪港將送大禮，噚日內地放寛隔離措施，已見資金流入旅遊及航空股，一旦香港亦放寛入境隔離措施，對香港當然係好事，除咗旅遊航外股之外，餐飲及零售股料可受惠。

問題係喺美元強勢，資金從港元流走下，港股6月嘅升勢能否持續，抑或純粹係半年結效應下，基金只係為咗粉飾櫥窗而力托股市，要待本周假期過後，下周再睇港股走勢先可以確定。畢竟近日資金持續從本港銀行體系流走，雖然以目前體系內仍有逾2000億盈餘，累計流走1000億資金對本港資金未構成太顯著壓力，但一旦資金加速流走，港美息差繼續拉闊，港股仍能否䇄立不倒，古天后仍有疑問。

古天后

(徐狄怡，證監會持牌人)