古天后日誌｜短線超買大市表現料反覆

6月1日，天氣炎熱，間中有幾陣驟雨，日間部份時間有陽光，氣溫將達30度以上。美股隔晚表現繼續反覆，三大指數最終報跌收市，道指跌222點；標指跟納指分別跌26點及49點。總結5月份，道指跟標指大致平穩，納指則跌逾2%。

美國總統拜登跟聯儲局主席鮑威爾會面，除咗賀一賀鮑爺連任之外，雙方亦有討論通脹問題。而一向偏「鷹」派的聯儲局理事沃勒表示，支持聯儲局喺未來幾次會議都加息半厘，指若通脹仍未接近2%嘅目標，半厘加息幅度應一直喺考慮之列。佢亦支持年底前聯邦基金利率高過2.5厘左右「中性水平(即理論上不會影響經濟增長的利率水平)」，直言若通脹仍頑固地高企，已準備好更進取地行動。

踏入6月份，聯儲局正式開始縮表，今個月將回收475億美元，而9月份收水將增至每月950億美元，暫時美股流動性仍然相當充裕，未知縮表收水後，會否影響到市場流動性。加上阿爺喺過去幾個月放水救市，一旦美元收水，或令人民幣下行壓力加大，中國未必能隨心所欲地繼續放水救市，呢個係中港兩地股市一直唔見有新水流入嘅原因。

A股吸引資金入場撈底

A股表現仍然反覆，國務院正式推出33項刺激經濟措施救市，噚日市場對此反應正面，外資已連續3個月錄得淨流入，似乎A股跟港股一樣，喺3月份已成功搵到底部，並吸引資金入場撈底。

至於港股呢邊連升幾日，恒指已先後收復10日(20558)、20日(20382)及50日線(20944)，噚日更一舉升破21200點阻力，下一個阻力區為21500至21600，能否更上一層樓，仍有賴成交配合。雖然噚日成交急升至超過2400億元，但當中逾千億元資金，實為MSCI rebalancing所致，千祈唔好誤會噚日成交急升係好似3月份咁有大量資金入場抄底。

尤其港股短短幾個交易日升逾千點，目前已開始呈超買，加上喺21000水平之上，聰明資金會變得更為審慎，大戶舞弄幾隻重磅科技股去控制指數變動，逾萬億市值嘅大價股，短短幾可以急升逾兩成，單日波幅更動軋超過3%，呢一種波幅又豈能係一般投資者所能承受。古天后就趁大市急升減磅套利，喺市況仍然反覆之際，實難坐定定等運到，只能高沽低揸多做短線操作，短炒打游擊暫時仍然係上策。

古天后

(徐狄怡，證監會持牌人)