《造星II》洪助昇簽英皇闖樂壇直踩15粒鐘拍MV

2022-05-24 12:00

曾參加《造星II》的Aiden進軍樂壇，直踩15粒鐘拍MV，入錄音室一句都錄唔到。

畢業於香港浸會大學電影學院表演系的洪助昇（Aiden），2019年參加ViuTV《全民造星II》打入20強，隨後入行拍劇、拍電影，最近更加盟EEG，並推出首支派台歌《憑實力單身》，正式進軍樂壇。

Aiden曾參加《全民造星II》。

自身愛情故事

歌曲是記錄一段相親卻不敢相愛的愛情故事，亦正是Aiden的親身經歷，「首歌入面，我自己最鍾意係『緩緩兜圈默默轉季』，呢幾句歌詞對於我嚟講，係十分之有共鳴。形容一種關係，經歷咗好多個四季，但其實佢哋呢種關係係一直喺一個圓圈入面旋轉，亦都冇任何進展，就係因為大家都唔夠膽跨越嗰一條線。」

MV中，Aiden有位異性好友，大家相處親密，卻不敢進一步化成甜蜜。二人假裝相處得相安無事，直至一天女主角想作個了斷，刻意迴避Aiden，著意親近另一群新朋友，而在電子遊戲機中心的一場戲，Aiden覺得正好帶出在同一空間，卻擁有各自世界的感覺，Aiden坦言自己亦最喜歡機舖那一場戲。

Aiden曾經歷一段相愛，但不敢愛的愛情故事。

洪助昇於2019年參加ViuTV《全民造星II》打入20強。

Aiden最鍾意歌詞中一句「緩緩兜圈默默轉季」。

大家都唔夠膽跨越嗰一條線，做唔成戀人。

同小白兔演戲好開心

MV走訪多個場景，由零晨十二時開始拍攝至翌日下午三時，對屬於早睡寶寶的Aiden來說，踩足15小時都頗辛苦，「有一個鐘係十分之眼瞓，但跨過咗嗰個鐘之後就好清醒。」不過最令他醒神，是突如其來的一位「小演員」，「我好鍾意小動物，喺機舖一幕，我要喺幾個小混混手中去搶一隻小白兔，突然有個咁樣嘅『演員』一齊演戲好開心。」

除此之外，首次入錄音室錄的Aiden亦表示非常難忘，「十分之緊張！因為我未試過入去錄音室錄一首真係屬於自己嘅歌，因為我覺得要演繹一首屬於自己嘅歌，真係要好清晰你想每一段呈現嘅情感，同埋你想分享嘅內容，同以前唱cover歌好唔同的分別就係，你要好清晰同埋要好知道呢一首歌你想點樣唱，每一個字你想點樣咬，所以第一日入錄音室嘅時候，我係緊張到一句都錄唔到。」