女特技人慧慧碌廿幾級樓梯爆頭致休克靠意志演到導演嗌Cut

2022-05-06 17:00

擔任特技演員長達21年、曾為無數女演員擔任過動作替身的「幕後女英雄」周穎箖（慧慧），昨晚擔任TVB綜藝節目《360秒人生課堂》嘉賓，旁聽嘉賓則為擁有近六十年龍虎武師經驗、慧慧恩師之一的火星哥。

慧慧小時候因為家人欠下過百萬巨債、年紀小小便幫忙看檔做小販，也因而練出好身手：「廿幾架車一齊走鬼，為咗唔畀人拉，我試過擒水渠二樓跳入後花槽，又試過跳山坡匿埋。」未幾小販生意捱不下去，慧慧放棄學業，並在花樣年華之齡「瘋狂打工」，短短五年內幫媽媽還清債務：「我每日打兩份工、瞓三個鐘，嗰五年不停遇到好多挫折，但我同自己講，條路直行有乜咁好玩，彎曲啲我老咗行嘅路可能更順。」天意弄人，好不容易捱過債務難關的慧慧之後竟再遇重擊：「十三歲嘅妹妹突然患腦積水爭啲死，我同媽咪崩潰咗，不停問點解，反而細妹冇問點解，佢永遠做完手術都話：『我冇事呀』，佢令做家姐嘅我更加要努力。」

由於行業內甚少女性，加上慧慧入行時白紙一張，她坦言曾遭受不少冷眼，但剛強的她偏偏愈戰愈勇，並以實力贏回應有尊重。她憶述有次碌大約廿幾級樓梯，意外撞至有少少休克，但導演未嗌Cut機，她仍靠意志演下去。原來慧慧當時撞到爆頭兼血流如注，不過她最終還是再三確定鏡頭順利拍好後才安心入院，相當敬業。

思想正向嘅慧慧，深信：「做任何嘢盡全力去做，那怕做得唔好，人哋都會包容你。」

因家人欠下過百萬巨債，慧慧年紀小小就要做小販，也因而練出好身手。

被指顏值高的慧慧，原來曾有機會轉戰幕前，但為了維持穩定收入養家，她放棄機會。

恩師錢嘉樂驚喜現身，令性格硬淨的慧慧忍不住哭成淚人。

見恩師嘉樂哭成淚人

即使八號風球，慧慧都堅持每日到公園鍛鍊身手，她解釋：「生老病死冇得揀，但如果我哋揀到自己鍾意嘅工作，就要珍惜。」謙虛又感恩的慧慧，最後逐一感謝多年來遇過的恩師，此時其中一名恩師錢嘉樂突然現身，令慧慧感動至哭成淚人。原來慧慧當年拍攝電影《旺角黑夜》時因毫不錫身舉動惹來錢嘉樂敬佩及關注：「有幕大逃亡戲有個妓女畀人追嗰時，離地飛起再撻落地嘅，現場冇嘢墊嘅，前後拍咗八次。嗰時嘉樂哥第一次識我，就話好嘢、呢個女仔有熱誠，之後佢嘅戲都一定有我份。」

對慧慧讚不絕口的嘉樂，更以自己做《獎門人》經歷勉勵慧慧及觀眾朋友：「我係曾志偉先生畀機會我，嗰時每次拍《獎門人》都係行刑咁、喺千幾人面前講嘢好似受難。但如果你將困難當係磨練，把刀磨利咗之後你又多一樣嘢。我識慧慧時，佢係臨演帶隊，睇住佢由咩都唔識再變成專業龍虎武師，佢真係捱得。我哋香港動作電影咁出色，唔係靠一、兩個人，而係靠一班無名英雄。」