頭條獨家丨李居明揭新光戲院有神秘空間加秘道紀錄片《粵劇靈》大爆靈異事

2022-05-06 06:00

第五波疫情漸趨緩和，玄學大師李居明要為港人打「加持針」，振臂高呼叫醒文化藝術工作者返出嚟，而他亦會為業界出啲綿力，除咗由他炮製嘅兩部玄學紀錄片《大剃度》與《通靈師》，會喺5月初於有線電視及香港開電視播出外，兩齣粵劇戲寶《蝶海情僧》和《大赤壁賦》亦於7月底在新光戲院公演。採訪：方騫平攝影：沈健程場地：新光戲院

由李居明炮製嘅玄學紀錄片《大剃度》及《通靈師》屢獲國際大獎。

為慶祝香港回歸25周年，率先喺7月1日上映紀錄片《粵劇靈》，片中探討李居明於過去10年喺新光戲院嘅經歷及不為人知嘅靈異故事：「如戲院有個令人毛骨悚然嘅神秘空間，係當年『女姐』紅線女用嚟休息嘅宿舍，呢個空間保持咗30年；仲有個永遠唔會用嘅化妝間，又有條神秘地道。」李居明更首次公開何非凡、鄧碧雲及一群老倌嘅靈異經歷及粵劇界禁忌。另外，新光戲院於7月尾公演蓋鳴暉「鳴芝聲」第11度重演嘅《蝶海情僧》及由吳仟峰、梁兆明、王超群及梁非同聯演嘅《大赤壁賦》。

李居明帶米雪遊新光戲院地下秘道。

賴慰玲喺《粵劇靈》中探索新光戲院嘅神秘空間。

新光戲院成中港橋樑
此外，講述41位青年人闖上日本第一聖山高野山，於漫天風雪下剃度7日遭遇嘅紀錄片《大剃度》；《通靈師》一片最矚目是史上首個「問米大擂台」，中美兩大問米通靈師「互問對方的米」，互揭對方的問米實力，分別於5月7至9日在有線電視及香港開電視黃金時段播出，而5月15日更會於有線電影台重播《通靈師》。明年李居明還打算開拍一部前世今生大輪迴為題材嘅電影圓心願。李居明表示，跟新光戲院剛續約3年，新光戲院喺未來日子會擔當香港及內地老倌往返兩地橋樑角色，從而促進兩地文化交流。