張敬軒首次執導手機電影受鏡仔海報啟發出「前夫的愛」

2022-05-04 23:30

近日，張敬軒受手機品牌邀請出任導演，以全手機拍攝手機電影《前夫的愛》。處男執導，向來高要求的軒仔坦言相當緊張，特別在片場時，「因為喺拍攝現場，全部crew嘅工作人員都突然間改口叫我做『導演』，所以每次聽到我都覺得好大壓力，不過亦都因為呢個壓力，驅使我有個動力，希望做得更加好。」

張敬軒受手機品牌邀請出任導演，拍攝手機電影《前夫的愛》。

現場個個工作人員都改口叫張敬軒做導演。

劇本方面，編劇陳詠燊（Sunny）預備了四個劇本，二人商討後，決定選用現在的故事，軒仔亦表示最喜歡這個劇本，他更分享親身經歷，「雖然呢個只是虛構嘅故事，但實情喺我身邊係真有其事。曾經有位男友人問我，可唔可以幫佢拎到MIRROR嘅海報，仲話係不惜任何代價，佢話好想送畀佢太太做禮物𠱁佢開心，所以呢個男仔成個過程係排除萬難，用盡各種可行方法，只係希望拎到張海報令佢心愛嘅人一笑。我喺成個過程入面見到好有愛，所以好想將佢拍成電影，向呢班『前夫』致敬。」一向諗頭多多的軒仔對於上年出現的各個社交群組例如「前夫關注組」等，一直有深刻感受，覺得這份情十分難得罕有。

有Sunny（左）為劇本把關。

張敬軒友人曾有求於他，想拎MIRROR海報𠱁老婆。

呢張海報好熟口面，望真啲，其實係12個張敬軒呀！

如果另一半係鏡粉，就知「前夫」唔易做。

問到故事中最喜歡的部份，軒仔謂：「我會選一開始飾演『換燈箱職員』嘅陳湛文，去到最後有一個反高潮嘅鋪排。」不過軒仔亦溫馨提示大家：「故仔係純屬虛構，偷嘢係唔啱㗎。」

陳湛文飾演換燈箱海報的職員。

最後在製作過程中，軒仔表示最困難是經驗不足，「唔好話經驗少，係直頭冇呢方面嘅經驗呀！哈哈。」所以軒仔亦十分感謝團隊的幫忙，「無論係監製編劇嘅Sunny Chan，定係美指嘅張蚊，定係整個團隊，不能一一盡錄，有佢哋嘅幫手、參與，先成就到呢件事。」同時亦令軒仔有另一番的體會，「因為之前一直係從藝人或者演員嘅角度出發去工作或者去睇一件事，但當調番轉頭，從一個幕後、一個導演去睇番出嚟，又係另一回事。」