一蚊Joe推「2D思捷」出場預咗唔見樣盼用生命炒熱氣氛

2022-04-09 11:45

李思捷為保護家中長期病患長者，早前以WFH方式隔空主持TVB遊戲節目《思家大戰》，幫忙做幕後「推手」、化身「2D思捷」的一蚊Joe（游莨維），雖然成日唔見樣，但就好開心自己成功引起網民關注，他受訪時說：「其實做得暖場主持都預咗唔會見到自己個樣。今次思捷畀呢個任務我，佢都好緊張，仲拍埋片同我講應該點樣做。」他透露拍攝當天一次過錄晒三集，由早上10點錄至晚上10點半：「每組嘉賓拍之前都要綵排，變相即係全日推咗6次車。嗰 12 個鐘真係冇停過咁滯，但又唔算太辛苦！」

用生命炒熱氣氛

一蚊Joe 感激思捷給予機會，他謙說：「真係開心都嚟唔切！思捷希望個節目有現場觀眾，所以需要暖場主持帶動氣氛，佢畀呢個任務我時我應承佢用條命嚟炒熱個氣氛。」談到思捷又做主持又做監製，一蚊Joe 坦言從對方身上學到不少東西：「思捷好堅持一定要綵排，台前幕後都需要好清楚節目嘅流程，遊戲節目最重要就係唔好NG，因為一NG道氣就斷咗。」

一蚊 Joe 感激思捷提攜做《思家大戰》暖場主持。

做幕後「推手」雖然唔多見到樣，但佢依然落力做動作搞氣氛。

一蚊 Joe 話其實好鍾意暖場主持呢個任務。

入行16年的一蚊Joe，又感性指辛苦其實是相對的，他透露曾為劇集《當旺爸爸》扮演焦屍，雖然出鏡時間很短，但背後故事卻一匹布咁長，他說：「首先用咗兩個鐘化妝，去到現場導演覺得效果唔夠，仲要再加炭粉，啲炭粉入晒耳仔、眼同埋指甲；然後個廠又凍，我淨係着短衫短褲。」等埋位等足2小時的一蚊Joe，笑指最終雖然只有兩句對白以及拍畢後病倒，但回想起該段經歷，還是覺得是過癮多於辛酸。

仔仔是《Master Joe》捧場客

一蚊Joe在2013年拍攝最後一《問問 Master Joe》，節目最近在周日重播，他指現在歲的囝囝可以重看，感覺好奇妙。他坦言好恨再有機會主持新節目，他說：「以前睇《Master Joe》嘅小朋友都大啦，若然有個節目可以搵番嗰啲小朋友，睇吓佢哋呢一刻做緊啲咩都幾過癮！亦都想同啲小人物做啲深度專訪，例如報販、街邊執紙皮嘅婆婆，依家大家都共度緊時艱，每個人都會有自己嘅故事同值得尊重嘅地方，如果大家明白到大家多啲，體諒自然都會多啲。」