獨家丨陳瀅怕跟同事有感情瓜葛難得跟黃宗澤唔「過電」

2022-03-27 21:30

陳瀅（Jeannie）最近在劇集《飛虎 3壯志英雄》首度飾演Madam角色，除了學揸真槍難，拍牀戲一樣是挑戰，好彩有經驗豐富的黃宗澤傍住，而向來易惹緋聞的Jeannie，亦難得跟黃宗澤（Bosco）唔「過電」，不過她坦承不似角色會跟同事有感情瓜葛，而且她已怕了再傳緋聞，因真心喜愛演藝工作，只想大家將焦點放回她演出。

採訪：杜杜

首次開真槍的Jeannie，齋掹制都覺得有難度。

劇中Jeannie跟同事Bosco，大搞一夜情後撻着。

Jeannie跟Bosco 首度合作即演情侶，她大讚拍檔似哥哥般照顧她，「我唔熟識嘅佢就會幫我同教我，譬如開槍戲佢會教我戴定肉色耳塞咁就唔會睇到，又會安全啲保護對耳。」至於兩人的牀戲Bosco 同樣有教路，「嗰場係講我好冇所謂，但係佢反而有少少尷尷尬尬，點知拍出嚟個效果反而係我尷尬，佢冇所謂咁，所以調整咗一陣。」

網民對被何國榮摸股一幕反應大，親身上陣Jeannie笑話當時跟角色一樣只想快點完。

愈大愈介意緋聞

向來似緋聞攝石的Jeannie，今次跟Bosco 竟然完全絕緣，「我哋好似兄弟，唯獨我哋做Live我錫佢個紙牌畀人話過，哈哈！佢成日話我唔似女仔，完全唔係佢鍾意個Type。」不過她承認不似角色會搭上同事，「我就唔接受同同事有呢種感情瓜葛，我要揀男朋友最好唔好係同事，萬一有啲咩事嘅話，之後見返會好尷尬，都會引起好多是非，無論我以前做喺Office做，或者入行後都係。」

Jeannie估不到跟Bosco開Live，竟爆出跟羅天宇緋聞。

1月開始休息的Jeannie，日日陪愛犬玩。

不過最搞笑Jeannie跟Bosco 冇撻着，竟被對方在直播爆出羅天宇暗戀她，Jeannie強調是場誤會，「我之後都有同天宇講，唔好意思一個Live會有咁嘅報導出咗嚟，其實Bosco 係講『天宇個角色喺戲入面係咪鍾意Madam嘅呢』，都唔知點解會變到咁樣。」她承認人愈大愈介意有緋聞，「我愈大個就真係覺得討厭，細個就是但啦！𠵱家唔會想人再用呢啲標題，講自己任何嘢，的而且確呢幾年我真係好努力去做我嘅工作，講真我要嫁或者搵個有錢嘅對象，我覺得唔難囉！但係我冇做到，因為我唔係咁樣，我要唔做嘢都唔難嘅，但我選擇呢條路繼續工作，係因為我真係鍾意，所以唔想再有呢啲緋聞。」