玩X爆香港地丨KB燒生啤去另一空間 Alina首主持綜藝獲讚

2022-02-12 23:00

ViuTV綜藝節目《玩X爆香港地》昨晚（11日）播出最後一集，今次李健宏（KB）、鄭伊琪（浩南）及李炘頤（Alina）三位主持前半集去埋葵青區，帶香港人搵嘢玩。三人與一眾團友到室內War Game場玩BB彈槍，KB玩起上嚟，完全唔顧兩位女拍檔，搞到浩南與Alina接受瘋狂BB彈放題，真係笑爆嘴呀！

呢個隊名好有氣勢。

帶團友去打War Game。

原來KB唔識打War Game。

浩南同Alina要捱BB彈放題。

昨晚（11日）是最後一集，後半段就帶同之前參加節目的各區市民到新界，找來師傅做咗場大法事，稱希望另一個空間的朋友仔都可以開心睇節目，因此燒咗好多睇緊ViuTV的紙紮電視，不過最驚喜的是，仲有隻近2米高的紙紮生啤（ViuTV吉祥物Sound Bear），估唔到繼ERROR啲節目炸生啤，而家KB仲燒生啤添！

帶歡樂俾另一個空間嘅朋友仔。

朋友仔一定好多謝KB。

有隻近2米高嘅紙紮生啤，下次唔知有冇生菜。

繼ERROR炸生啤，今次有KB燒生啤。

《玩X爆》系列以往都是由KB主持帶大家去外地旅行，不過受疫情影響，他就帶大家《玩X爆香港地》，片尾感想都話原來拍香港先係最困難，因為這個地方香港觀眾太熟悉，不過完成到都好開心。KB早前曾在節目中稱，事前看到浩南與Alina來Casting都曾經有啲擔心，不過合作拍攝時兩位女主持都非常放得開，三人都合作得好開心。

三位主持首次合作。

大家都拍得好開心。

而首次主持綜藝節目的Alina，在節目中的表現亦都獲網民讚賞，指她很放得開，而且轉數都幾快，叫她繼續努力。而Alina昨晚（11日）在節目播完後，也在IG打長文分享首次主持的感想：「由我完全冇信心去Casting嘅第一日到今晚播出最後一集🥲所有嘢都非常感恩！『唔容易』，因為疫情，我哋拍攝上有好多掣肘，辛苦寧爺KB同團隊們，大家都盡最大嘅努力用盡最有限嘅資源去比最好嘅嘢大家睇！」又十分多謝參加的所有團友，將人同人的距離拉近，帶出香港人的人情味。她亦知道自己仲有好大進步空間，對於外界一直覺得佢份人好寸，有Fans都力撐其實Alina為人好Nice。而Alina都表示：「希望假寸寸感覺可以慢慢拉番平均啲。」仲話會繼續努力呀！