獨家丨KB望疫情幫觀眾放鬆 同Alina 浩南穎琳玩爆香港
2022-02-10 22:30 
KB（Kevin Boy）最近拍住Alina（李炘頤）、浩南（鄭伊琪）和旗下藝人穎琳（劉穎琳）主持ViuTV節目《玩X爆香港地》，疫情下大家冇得飛去外地旅遊，於是透過節目介紹香港好玩地方。KB今次仲專登安排觀眾參與拍攝做團友，希望在鏡頭前後的觀眾，都可以在疫情下一齊玩，一齊放鬆一吓。採訪：杜杜 攝影：沈健程
講到搵3位新拍檔一齊玩，KB話最熟是Alina，兩人經常在Gym房碰面，「未識佢前觀眾會覺得佢黑面，個人麻麻哋，其實佢個人好好，想畀大家見到佢最真一面；而喺公司見到浩南，呢個小妹妹唔怕醜，一輪嘴咁講嘢，搵佢拍節目應該冇悶場；而穎琳就係因為ViuTV節目太高質，想試吓啲冇咁高質，所以就搵咗穎琳幫手。」
拍節目必自肥
今次節目KB減少了整蠱人，原來他收Order做嘢，「今次公司畀咗個Order我，希望見到唔同嘅KB，唔再係整蠱同ＸGames嗰啲。」至於每集邀請當區街坊做團友，KB就解釋，「可以畀到香港人或者啲團友放鬆一日，玩之餘，仲可以睇到平時拍節目係點樣嘅一回事，香港近兩年咁大壓力，希望佢哋可以輕鬆一日。」KB坦承自己都有得着，「自己多咗了解自己，了解多咗香港呢個地方，希望節目令香港人更加欣賞呢個地方。」
KB承認每次拍節目都有自肥項目，譬如今次就試了扒龍舟及到麻雀館打麻雀，至於Alina和穎琳就最難忘首次去露營，Alina更因而愛上，「體驗咗一晚露營會愛上，同埋喺香港好幸福，要山有山要海有海，而全部嘢一個鐘度可以去到，同埋自己跨出咗一步，同啲唔係好熟嘅人，傾到多啲深入嘅嘢，我係個好慢熱嘅人，好多時一班人會坐埋一邊聽，今次要讚吓自己，好似開咗少少個心。」穎琳露營時太凍唔夠衫，獲團友借衫好溫暖，「好開心同啲團友好似朋友咁一齊玩。」而浩南最難忘是去探靈，「我會睇呢啲節目，但日頭先敢睇，今次夜晚去探靈，親身去Feel成件事，真係好驚。」
立即下載 | 全新《星島頭條》APP :https://bit.ly/3yLrgYZ
最新回應