雷有輝搵阿仔拍MV被10個女仔摑 雷瑋陶睇新聞知晒老竇情史

雷有輝（Patrick）聖誕節推出新歌《女同學》，日前忙於拍攝MV，請來愛兒雷瑋陶（Matt）繹演年青時的自己，周旋於數位「女同學」之間！Patrick笑言故事純綷虛構，讀書時期並不風流，更自稱當年出名專一，並謂：「呢次係順便將個『衣鉢』傳畀佢，咁我就提早退休，屋企所有開支都交晒畀佢負責。」

 

Patrick在身邊監場。

 

其實係叫啲女仔大力啲摑落去。

 

兩父子默契甚足，訪問其間大爆笑料，互相稱對方為「Pat哥」、「師兄」，父子間完全沒有隔膜。Patrick話老婆有來監場打氣，其實是來「揀新抱」，搞到囝囝不知所措：「其實阿仔都係二十歲，唔使心急！以我所知佢都有試過拍拖，但呢一刻係單身，我緊係想佢感情世界豐富啲，頭先女演員未埋位都會同我傾偈，人哋一OK就冷落我，好似透明咁，真係好慘。今次MV佢有10個女仔同佢煙韌，睇落好似好爽，但係每一場最後都要比對方摑一巴掌，你以為我企側邊係監場咩？我叫佢哋大力啲打落去，咁先拍得真實！」

 

Patrick叫囝囝承繼衣鉢。

 

Matt自言乖仔專一唔似老竇咁花心。

 

囝囝雷瑋陶就話今次「義工」演出，笑言自己不似爸爸花心，會專一對待女友：「其實佢以前啲新聞我都有睇過，都大概知佢嘅情史。今日我純粹係做戲，現實中係一個乖乖仔。呢次MV『Pat哥』都話冇酬勞，最多係請我食飯，咁佢養咗我20年，都係時候要回報翻畀佢。」