獨家丨薛家燕傳承演藝使命添Honey Bees新血 孫仔腳頭好工作有增冇減

薛家燕今年5月榮陞嫲嫲，孫仔Julian人見人愛。原先家燕姐打算減產湊孫為樂，不過，孫仔腳頭好超旺「家燕嫲嫲」，除咗有幾個廣告打兩嫲孫主意外，更有海外登台，而且《全民造星IV》參賽者榛綦、坂部佩莎（莎莎）、港姐冠軍宋宛穎及《聲夢傳奇》鍾柔美(Yumi)都曾係佢學生，搞到藝術中心好旺場，工作欲罷不能。採訪：方騫平 攝影：沈健程

家燕姐有好多Fans。

 

家燕姐於工展會大受歡迎。

 

家燕姐讚孫仔腳頭好，令她工作有增冇減。

 

上周薛家燕喺大女石祐珊陪同下踩入工展會場，為合作咗好20多年嘅本地電器品牌攤位打氣，跟觀眾玩遊戲，家燕姐沿途都大受歡迎，唔少fans大讚孫仔好得意，家燕姐甜在心頭，至於會否畀佢做小童星？她開心大笑說：「我都覺得佢好得意，半歲經已識呀呀聲嚟和唱《皆大歡喜》，好有嫲嫲嘅藝術細胞，但演出呢方面交返畀個仔同新抱決定。」

家燕姐感激一直獲廣告商支持。

 

家燕姐好搞笑，喺長者入口位打卡。

通關後會返內地會男友

薛家燕承認有唔少廣告商打兩嫲孫主意，但最緊要係啱小朋友：「我諗尿片、童裝都ok。不過我都好感激有咁多合作伙伴，好似本地家電品牌係我第一個接拍嘅廣告，由20幾年前最失意時候開始支持我，我仔女啲學費係靠晒佢哋，就算孫仔出世都送出即熱水機畀BB沖奶用，所以有咩需要唔使講嘢。」另外，𠵱家家燕姐做完《麻雀鬥室三缺一》再忙拍《新春開運王》，又傾緊登台及籌備緊《家燕媽媽藝術中心大匯演》，工作量有增冇減：「但通關後我會第一時間返內地會男友，疫情下有年幾兩年冇見面。」至於藝術中心愈嚟愈多人報名，家燕姐都希望揀選多啲女子組合Honey Bees新血，傳承演藝使命。
 

 

港姐冠軍宋宛穎及《聲夢傳奇》鍾柔美都曾係佢藝術中心學生。

 

大女珊珊生日，一家人難得出嚟食飯慶祝。

 

家燕姐要添加少女組合Honey Bees新血，（左起）坂部佩莎曾經都係其中一員。