Yanny@SG工作中迎32歲生日 男友冇送蛋糕食壽司慶祝補償

Super Girls（SG）成員陳穎欣（Yanny）22日在工作中迎接32歲生日，期間獲劇組送上蛋糕，令眼淺的她不禁感動到眼濕濕，還直呼「最愛開工」：「可以逼大家同我講生日快樂，得到好多祝福。」Yanny笑言生日正日拍攝是好兆頭，寓意「年年有工開」：「去年受疫情影響，工作機會減少，所以有工開覺得好感恩，希望多啲嚟密啲手，填補番去年嘅收入。」
問到男朋友有何表示？Yanny即甜絲絲表示：「佢好理解我嘅工作，所以唔會怪我掛住開工；不過聽日放假，我哋會食壽司慶祝！噚晚我講笑話佢冇準備蛋糕，佢話佢年年生日我都冇送蛋糕！其實我個人一向冇乜儀式感，所以依家都會學識，要適時為重視嘅人準備驚喜。」

Yanny指生日正日拍攝是好兆頭，寓意「年年有工開」。

回顧今年，Yanny除了專心發展演員事業，也跳出舒適圈與不同網上平台合作，在工作上交出了漂亮的成績單！她坦言2021年是人生中重要的一年：「雖然入行已經十年，不過今年覺得自己好似新人一樣，接觸咗好多唔同範疇，尤其與人相處同合作嘅過程之中，獲益良多！早幾日我睇返兒時日記，當時自己好想做演員、喺人面前表演，從來冇諗過今日可以實現夢想，所以人生嘅嘢好得意，只要朝住目標進發，終有一日可以夢想成真。」至於生日願望，她笑言經常被人催婚，但目前希望為事業衝刺；作為演員的她更寄望遇上好電影：「好想拍到一部代表作，以後老咗可以畀子孫睇，婆婆都識做戲㗎！」

Yanny開心到喊。