甄子丹賀兒子James14歲生日 全家皮褸Dress Code勁醒神
2021-12-15 08:00 
「宇宙最強」甄子丹今年工作冇停過，先到內地長白山拍攝電影《搜救》，之後又到歐洲拍攝荷里活新戲《殺神John Wick 4》，連埋隔離日子，有近9個月唔冇陪家人。子丹日前喺活動上好感慨話大女甄濟如（Jasmine）已經比佢高，而細仔甄濟嘉（James）就同佢一樣高，而且已經變聲。
噚日喺細仔James嘅14歲生日，向來愛錫子女嘅子丹就為囝囝搞咗個生日派對，仲喺社交網上載全家福。佢哋仲有玩dress code，一家人齊齊穿上黑色皮褸，而壽星仔就着住紅色皮褸，非常sharp醒。James一向好有音樂才華，喜歡彈鋼琴，生日蛋糕亦是以音樂為主題，用樂譜作點綴，好有心思。
子丹同老婆汪詩詩好肉緊咁錫囝囝面珠。子丹以英文留言祝James生日快樂，仲好感觸咁話：「你變得如此出色，英俊的年輕人！很遺憾爸爸在外出拍攝時錯過了太多和你在一起的時刻（幸運的，是我們有你能幹、聰明的媽媽讓你、你的妹妹和家人保持完美和諧，充滿愛和色彩！你知道你的才華來自哪裡！ ☺️)祝你繼續快樂、成長、發現、探索，做作曲高手，做生活高手！（當然要努力，少玩遊戲，多學業，多練習！😆) 永遠愛你，兒子！並享受這一天！」
最新回應