C AllStar邀Nowhere Boys合作有新發現 編曲出盡收藏加強效果

組合C AllStar全新專輯《人類世》內的新歌《北極熊的遺言》，是成員陳健安（On仔）首次擔任歌曲監製的作品，他更邀請另一組合Nowhere Boys為新歌編曲。Nowhere Boys之後在九展Music Zone舉行演唱會，就邀請On仔擔任其中一場特別嘉賓。因歌曲結緣，C AllStar籌備製作studio Live，決定兩隊一齊玩，分別獻唱《北極熊的遺言》及Nowhere Boys的《我在》，九個人逼爆錄音室。

互唱對方的歌曲。

兩隊合作好老友。

Nowhere Boys主音Van（陳維諾）坦言收到邀請時既開心又迷惘：「其實今次合作真係好開心，但On仔當日畀個demo我哋聽嘅時候，佢已經自己彈晒所有音樂，究竟佢搵我哋做咩呢？但其實呢個做法好好，畀咗一個好好嘅方向我哋，加埋我哋結他手阿Ken嘅音樂效果，令成首歌感覺再凍啲。」On仔補充說：「有時對自己嘅決定會好猶疑，但Nowhere Boys畀咗好多信心我。」收藏不少古董級音樂器材的結他手阿Ken，在編曲時出盡法寶，Van更踢爆隊友錄完結他solo時說：「今次真係光宗耀祖呀！」而兩隊合作過後，Van大讚C AllStar為《我在》配上獨有的和音：「好似有四個天使喺我隔籬唱歌咁，首歌本身好rock，原來C AllStar都可以好搖滾。」

C AllStar與Nowhere Boys在音樂上合作，有不少交流。

On仔首次為C AllStar歌曲擔任監製。