昆凌6歲囡囡寫英文信畀聖誕老人 3個願望考起媽咪

2021-12-14 10:00

聖誕節將至，係好多小朋友喜愛嘅節日，因為除咗食大餐，仲可以收到「聖誕老人」（即係父母/親戚/朋友）花心思送嘅禮物。台灣天王周杰倫（周董）嘅太太昆凌最近就喺社交網公開咗6歲大女小周周（Hathaway）一封用英文手寫畀聖誕老人嘅信，落足心機畫咗棵聖誕樹同餅乾嘅插圖，佢話：「給聖誕老公公，我是Hathaway，我今年6歲，謝謝你去年帶給我的禮物，我很乖。」

小周周咁乖，當然要向聖誕老人許願，講出自己今年想收到嘅聖誕禮物，並列出3個條件：「我想要一些可愛的、白色的、還要跟貓咪有關的。」仲好窩心祝對方有個美好嘅旅程。

冇實際想講要乜，反而令媽咪昆凌更加頭痛，即向網民求助：「有任何好意見能給聖誕老婆婆嗎？」集思廣益下，有網民就話其實好簡單，只要送番隻可愛嘅白色貓咪公仔畀囡囡，或許可以一次過滿足3個願望。