C AllStar打入叱咤組合五強盼奪獎 4年冇出席頒獎禮恨上台唱歌

組合C AllStar在《2021年度叱咤樂壇流行榜頒獎典禮》的「我最喜愛的組合」，順利打入五強，而新專輯《人類世》亦在今日推出，聖誕節前更與鄭欣宜開騷，四子加盟寰亞10周年「留低的與重生的 C AllStar Archive」展覽今晚進行揭幕禮，可謂「四喜臨門」。

對於「四喜臨門」，C AllStar笑言愈多愈好，為了《叱咤》可乘機在Live拉票，亦可以到老人院拉票。對於可有信心獲獎，On仔坦言打入五強已經好開心，最想得獎後能夠在台上唱歌畀大家聽。他們說：「4年冇去頒獎典禮，原來粉絲識投票，但未諗到如果得獎上台講乜，應該會多謝說話。」問到Jase如得獎後可會咀隊友King集郵？King即搶答：「唔願意。」Jase搞笑謂：「有得你揀咩，夾硬嚟。」

釗鋒透露今次辦的展覽會，當中會展出過往MV中曾出現的聖物，亦有粉絲一直收藏的Yes卡、心願卡，還有歌曲《集合吧！地球保衛隊》的訊號器等。On仔說：「今年成個project有連貫性，由影像、演唱會到呢張新專輯，希望大家喜歡我哋一直以來堅持嘅概念專輯做法。其實好難得，喺呢個時代仲可以做一張實體專輯，係好感恩。」