C AllStar練十字步為欣宜伴舞 笑稱表演新研製「四十步」

2021年全新本地音樂會系列《我是現場》音樂會004，將為樂迷帶來鄭欣宜 x C AllStar的五人組合，在聖誕蒞臨之前，與大家提早歡度節日。

過去Joyce與C AllStar都有同台演出的機會，但聯手開Show卻是首次。難得與C AllStar聯手霸佔Star Hall，Joyce揚言要挑戰不太擅長的和音！Joyce說：「C AllStar做嘅 A Capella好靚好和諧，我係和音災難，但都想突破自己，同佢哋夾一Part，唱一首歌都好。」對此C AllStar都十分歡迎，On仔更提議：「有啲歌可以有個高音部份，就等Joyce挑戰一吓。」除了合唱外，King想為Joyce的作品「加料」，他說：「Joyce有好多跳舞歌，或者幫佢做Remix，做啲電子上嘅合作。」

音樂以外，相信很多樂迷都很期待欣賞Joyce跳舞，她當然樂意至極，更說：「如果C AllStar可以同我跳舞當然更好啦！之前為咗音樂會開會，我好似偷聽到釗峰話想跳舞。」釗峰笑言：「會盡量配合Joyce，喺佢隔離伴舞，佢勁歌我哋十字步。」Jase更說：「我哋會為Joyce新研製四十步，4個人跳十字步，就係四十步。」