獨家丨何依婷首做女一被批評爆喊 怕傳緋聞拒同羅天宇食飯

有傳27歲「小花」何依婷（Regina）肯賣身TVB 20年，所以入行短短4年就能火速做女一，於新版《十月初五的月光》坐正做女主角君好外，仲做埋年青版孿生姊妹莎華及莎莎，超有發揮！不過，有經典劇集珠玉在前，難免會有比較，何依婷接受本報訪問時忍唔住放負爆喊：「我都唔認同自己，我怪責自己…」語畢，眼淚大大滴流落嚟，好慘慘豬呀。採訪：方騫平 攝影：葉君海

深入民心 2000年版的《十月初五的月光》好深入民心。

TVB台慶劇《十月初五的月光》成為最近熱話，因為21年前的舊作中，張智霖及佘詩曼所演的角色太經典，比較在所難免。網民狠批何依婷演技未到家，聲音又吵耳，雖然都有網民幫拖話要畀時間新人磨練演技，但唔夠負評厲害，不過從來都話有人鬧總好過冇人講。 

 

再接再厲 去年何依婷性感出席台慶頒獎禮角逐「飛躍進步女藝員」，今年獲獎呼聲高。

 

知道把聲太嘈已調節

對於負評，何依婷一輪嘴回應：「冇法子，作品出街會有人鍾意亦會有人唔鍾意，呢啲我睇得好淡，有建設性嘅評語會參考。多謝錫我嘅朋友好似陳曉華、黃庭鋒、丁子朗，同埋好多fans踴躍留言鼓勵我，而何遠東讚我一人分飾3角做得好好。其實都會有唔開心，但有啲批評得都啱，好似話我把聲太大聽到觀眾好辛苦，諗返起初頭拍發脾氣場口，每場拍完都好耷，足足食咗幾包喉糖，拍咗幾日同導演講覺得太嘈要調節，所以之後有改良版，我哋keep住拍幾日就睇一次片改善。」
 

投入演戲 於《陀槍師姐2021》拍撞車身亡戲，何依婷表演獲讚好。

 

擔正主角 胡鴻鈞及何依婷喺新版中分別飾演男女主角初哥哥及君好。

對「考牌作」問心無愧

問到點睇「考牌作」?她笑住兜圈：「我畀唔到分自己，其實觀眾只係睇到螢幕上嘅何依婷，實際上何依婷點捱更抵夜，日曬雨淋，返到屋企冇得瞓堅持睇劇本，所以我對自己嘅評價係問心無愧，經已盡咗最大努力。」她再講出「大道理」為自己打氣：「感恩有一半人都話幾好呀，可以睇落去，人生唔可能永遠一帆風順，當去到咁嘅位置就要承受相應嘅壓力，唔可以要求全世界愛你，今次係上咗handle壓力嘅好好一課。」

 

上位唔快 何依婷話入行4年有成長經歷，唔算好快做女一。

唔想惹緋聞抹殺努力

Regina講到眼濕濕，透露自己係好情緒化嘅人，亦有為報道喊過，同時又唔想人哋知佢唔開心，壓力位來自怕令人失望，講講吓終於忍唔住喊出嚟，「唔需要大家同情我，我內心好堅強，抹乾眼淚就冇嘢…」她冷靜下來緊張地叫記者唔好寫佢鍾意喊：「我覺得好瘀，都唔係第一次咁喊，我唔鍾意喊嘅形象。覺得自己做得唔好所以唔開心，連我都唔認同自己，因為對自己有要求，會傾向怪責自己。」另外，她又自爆怕惹緋聞，主動同羅天宇提出要避忌吓，唔好一齊食飯，最怕畀人誤會抹殺咗大家嘅努力，對兩個人都唔公平。 

放負爆喊 何依婷對自己有要求，對負評喊完又笑。

過度吵耳 劇中何依婷因為把聲太嘈被網民投訴。

保持距離 何依婷好怕惹緋聞，主動同羅天宇提出要保持距離。