獨家丨施匡翹承諾到時必有嘢睇 得七首歌開處女個唱冇有怕

出道兩年多的施匡翹（Zaina），趁聖誕節「處女下海」，於本月20日在九展開日夜兩場《stay》音樂會。之前她在社交網上載一輯性感靚相，身穿低胸裙展露「湯碗胸」，對於大家對她有「期望」，她承諾演唱會時一定會有啲嘢睇，至少都會騷吓46吋長腿。

採訪：方騫平   攝影：葉君海   服裝：MODEMENT   化妝及髮型：Wingkee Makeup   形象：Janae陳灝而   場地：FAM囍公館

十二月有好多歌手開騷，施匡翹都嚟湊熱鬧。

 

施匡翹形容開處女Show好突然，「個半月前經理人Apple姐打嚟同我講，問我『年尾搞個演唱會好唔好？』一星期後就話行動喇，其實出道時間尚短，雖然好似早咗啲開騷，但開完個唱後能增加經驗係好事，有得做就gogogo盡力而為啦！𠵱家算幾好，除咗唱歌以外會拍吓劇集，仲會學車及排舞，生活過得好充實。」

之前施匡翹在新城頒獎禮記者會上大晒「湯碗胸」。

「湯碗胸」係性感極限
施匡翹僅推出5首單曲及兩首合唱歌就膽粗粗挑戰個唱，問到能否撐到成個騷？她就叫大家唔使擔心，歌迷都好開通，好鍾意聽她唱翻唱歌，而且導演將她5首單曲分成幾個主題，如《康復期》會比較傷感；《stay》係跳唱部份，到時會有跳舞環節，至於會否換上性感戰衣配合？Zaina笑住爆少少：「唔係性感，服裝設計係比較誇張，好似着喺模特兒身上咁，平時唔會見到我有呢身打扮，咁我都鍾意畀人設計形象試多啲新嘢，不過，上次嗰條火辣紅裙係我嘅極限，大膽程度唔會超越呢個界線，相信最多喺露腿。其實上次係尊重新城頒獎禮場合而着，喺朋友鼓勵下諗咗好耐先敢放上社交平台。」

施匡翹喺《stay》MV中露46吋長腿。

施匡翹今次小試牛刀，目標喺紅館演唱。

施匡翹游水練氣，望以最佳狀態示人。

施匡翹搵嚟林德信拍歌曲《差不多小姐》MV，林德信亦會係演唱會嘉賓。