花姐約姜濤談未來發展大計 網民賣口乖頒「我最喜愛經理人」

MIRROR、ERROR 兩大男團今年除打入商台「叱咤樂壇我最喜愛的組合」5強外，MIRROR成員姜濤、呂爵安(Edan) 、陳卓賢(Ian)及盧瀚霆(Anson Lo) 更在「我最喜愛的男歌手」5強中佔4席位。作為16子的幕後功臣兼經理人黃慧君（花姐）今日於社交網上載了一張姜濤身穿淺藍色衛衣，在床上攬着棉被的靚仔相，並透露最近與姜濤討論年尾頒獎禮及未來發展動向，同時希望大家投票以外，更會欣賞16子的作品。

花姐寫道︰「近排都會同老姜討論吓出歌，年尾頒獎禮，未來發展嘅嘢。見到大家咁支持自己真係好開心，呢份厚愛帶畀我哋無限動力，邊個唔想有好成績，但對MIRROR、ERROR、對老姜嚟講，可以有機會做好音樂，繼續可以喺舞台表演，可以嘗試唔同嘅挑戰先係最想要嘅野。所以希望大家投票畀我哋嘅同時，亦希望大家欣賞我哋嘅作品，陪着我哋成長。老姜金句，『用我哋作品去感激大家對我哋支持』。16子謝謝你們的每一票，無論成績如何都會繼續努力！如果有『我最喜愛粉絲』呢個獎，必屬鏡粉同錯粉。」有鏡粉即賣口乖表示：「如果有『我最喜愛經理人』獎，必屬花姐！」